Mizoram Sorkar Higher & Technical Education Department chuan Semester System chungchangah thuchhuah ahnuaia ami ang hian a siam.
Semester System hian zir dan kawng hrang hrangin a ti danglam dawn a, chu chu ram tana tha tura Central Sawrkar Education Ministry in a ruahman a ni. Zirna siamthat (Academic Reforms) chungchang hi kum 2006 lam daih atang tawh khan Committee hrang hrang siama ruahman tawh a ni a. University Grants Commission (UGC) in Committee hrang hrang siamin Academic Reforms chungchangah rawtna tam tak a siam chhuak a, University leh College lamah te zirna tha, ram changkangte um phak theih tura World Class Education siam hi a tum a ni.
UGC in kalphung tur a duan te chu - Europe leh ram changkang zawka Semester System an kalpui tawh anga Semester System hi University leh College ah hman tura tih a ni. Mizoram University in a lo rel tawh angin Mizoram Under Graduate College zawng zawngah hian kum 2011 June atangin Semester System hi hman tura a lo ruahman tawh a ni a, hetia University in a lo rel tawh ang hian Mizoram Sawrkar pawh hi a in buatsaih mek a ni.
Higher Education Department hian Minister hova Committee vawi eng emaw zat neiin felfai taka kalpui theina tur a ngaihtuah reng a. Sum leh pai harsatna tlem a zawng tih loh chu buaina dang awm lo tura beisei a ni. Semester System ah hian zirtirtute, Non-Teaching staff te leh Classroom te duh belh tura ngaih anih laiin thawk leh khatah tih thut theih a nilova, sorkar-ah ruahmanna tha zawk a awm theih nan theih ang anga ngaihtuah mek a ni.
Semester System ah hian zirlai in class ah 75% a kal chuan subject thenkhatah fail mahsela, pawl sawn zel tura ruahman a ni a. Hemi a nih avang hian 1st year ah tunhma angin naupang an la tam thei lo a, chuvang chuan seat indaihlohna a awm palh thei ta a ni. Tunah hian Department chuan sorkar ah harsatna te thlenin a buaipui mek zel a. College lut duh zawng zawng ten an luh theuh theihna tur pawh buaipui mek a ni bawk. Zirlai leh nu leh pate pawhin dawhthei taka lo nghak turin Department chuan a ngen a ni.
Higher Education Department hian an hotu ber thlengin hun rei tak atang khan ngaihtuahna an hmang reng a. Tluang tak leh tha taka semester system kalpui a nih theih dan tur hi an ngaihtuah reng a ni. Department hian he harsatna hi chinfel theih ngei a beisei a ni. University lam nen pawh a inrawn rengin semester system fel taka hman a tum a ni.
Mizoram zirlai tam ber ten Aizawl khawpuiah luhna seat an hmu lo palh a nih pawhin Mizoram chhung tho, College tha tak tak awm ah te hian seat an chan a beisei awm a ni.
Zirlaite hian college liante an bawh deuh bik a, heng college lianah seat a indaih loh em em lai hian college dang tha tak takah seat a la khat lova, heng hi hnawhkhah a nih hnuah a la in daih loh chuan Day Class bakah Morning Shift emaw, Evening Shift emaw siam pawh zirtirtute lam chuan an inhuam em em chungin zirlai neih dan chhutin Day shift veka kal theih hram tumin Principal Council leh Mizoram College Teachers Association (MCTA) te nen sawi hovin ngaihtuah zel a ni bawk.
