Indian Institute of Public Administration (IIPA) Mizoram Regional Branch leh MZU Public Administration Department tangdun buatsaih khawpui hmasawnna chungchanga inrelbawlna leh mamawh hmasa (Administration of Urban Development & Basic Services) tih thupui hmanga seminar chu vawiin khan I & PR Conference Hall-ah Parliamentary Secretary to CM Pu Lal Thanzaran a hawng a, IIPA President Prof. C. Lalkima Autobiography a tlangzarh nghal a ni.

Seminar hawnna thu sawiin Parliamentary Secretary chuan hetiang mithiam rual leh zirsang hoten ramhmasawnna hawizawnga seminar an buatsaih thin chu a lawm thu sawiin kawng tinrengah rah tha tak a chhuah ngei a duhsak thu a hlan a. India ram danpui zingah mahni duhzawng leh vei zawng sawichhuah theihna zalenna awm hi Mizo zingah kan hmang tangkai em em a ni tiin chanchinbu leh thil dang dangah te pawh sorkar phut leh finchhuah kawnga mi tam takin an ngaihdan an auchhuah pui thin te hi thil sawt tak a ni a, chuvangin Public Administration lama mithiam rual leh zirlaite pawh hian sorkar kalphunga sawitur an neihte chu tualchhung chanchinbu hmanga puangzar ve thin turin a chah a ni.

Parliamentary Secretary chuan AMC din anih tak dan sawiin hei hi a hming mai nilovin hnathawk tura ruahman a ni a, tun dinhmunah Aizawl khawpui chhunga sanitation te, tuichhia leh bawlhhlawh thenfai hna te, lirthei khuahkhirh leh parking fee khawn bakah insak dan dinglaite chu an kut ah dah a ni tawh a; an mawhphurhna leh hnathawh tur pawh pek belh zel tum an ni a ti. Pu Lal Thanzara chuan Aizawl khawpui cheibawl kawnga sorkar hmachhawp thenkhat tarlangin Vaivakawn - MZU kawngpui cheithat nan hna tan thuai anih tur thu te, Sihhmui - MZU kawngpui siamna tur sum awmsa niin a thawk tur pawh zawn mek an nih thu te leh Aizawl khawpui kawng dung zauh leh chei hna chu fur ruahtui reh fel huna tan a nih tur thu te a sawi a. Khawpui chhung tui intur pekna pawh thawh a ni ang a ti.

JNNURM hnuaiah chhungkaw rethei 1096 chenna in tur Edenthar, Durtlang, Rangvamual leh Lawipui ah te sak mek an ni a, Rajiv Awas Yojana hnuaiah chhungkaw 142 tan Zuangtui ah chenna in sakna tur pawh sorkar laipui atanga hmuh fel a ni tawh bawk a ti.

Vawiin seminar hawnnna hi IIPA Mizoram Regional Branch President Prof. C. Lalkiman a kaihruai a, seminar thupui sawina Prof. Srinibas Pathi, MZU in a hmang a, an pawl life member 3 tunhnaia chatuan ram pan ta Pu R. Thansanga, Pu P. Lalnithanga leh Dr. Rakesh Hooja te sunna hun hman a ni a, mithiam thlanchhuah ten an thuziak te chhiarchhuak a sawihona hun hman zui niin tun tuma seminar neih hi rampum huap Prelude Conference, New Delhi a October a neih tur atana inbuatsaih lawkna chi khat a ni.