Vawiin chawhma khan YMA Conference Hall ,Lunglei ah Arts & Culture Department leh Mizo Academy of Letters Sub-Headquarters Lunglei te buatsaihin ‘Seminar on T.Nghakliana leh Hrawva Sulhnu’, zirchianna neih a ni. Pu C.Hrangdula ,President MAL, Joint Headquarters Lunglei in a kaihruai a, Pu Lalrinliana Sailo,MLA chu khuallian a ni.

Khuallian chuan thusawiin Mizoram a miril pahnih chanchin chhuina a khuallian tura Mizo Academy of Letters Jt.Hqrs. Lunglei in hun an pek avangin lawmthu a sawi a.Thuziak mite avang hian inpumkhatna a thleng a, chu bakah thil hlui tam tak thangtharten kan hriat loh kan hriat phah thin a. Ziaktute hian mi thinlungah rah tam tak a tuh thin a, indona ah pawh remna thlentu a ni thin a ni, a ti. Pu Hrawva hi mi lehkha thiam hmasa a ni a, pa nun khawhar tak a ni a,a belh Pathian chuan a khawhar a hnem a, malsawmna tam takin a vur a ni.

Pu T.Nghakliana chu midik, dik nia a ngaih chu tlang takin a kalpui a.Ram leh khawtlang tana tha chu huai takin a ziak mai thin a ni. Kan thalaite mahni a an intodelh theihna tur hi a vei hle a, khawvel a lo changkang zel a, chuvangin changkanna te hi hmuah dan kan thiam a ngai a,kan awmna chin chin a changkan i tum ang u a ti. Thu leh hla mai a tawp lovin ram hruaina kawngah te tan lak a ngai a,hei hian kan thalai lo kalzel tur te a siam that ngei a ring a ni.

He seminar ah hian Pu C.Chhuanvawra,Vice President,MAL Aizawl in Pu Hrawva chanchin leh a sulhnu te a sawi a, Pu T.C Zonunsanga, resource Person niin Pu T.Nghakliana chanchin a sawi bawk a ni.Pu T. Nghakliana leh Pu Hrawva te chhungkua aiawh ten thusawina an nei bawk. Chawhnu lamah Pu K.Krosthanga ,Treasurer, MAL kaihruaina in sawihona hun hman a ni.