Vawiin khan Vana Pa Hall ah Pu R Romawia,Art & Culture Minister hovin Seminar on Tawng dang Mizo tawnga sengluh programme hman ani a.Mizo tawng tobul leh tawng inher danglam dan te zira sawiho a ni.
Mihringte tawng kan inhriat pawh dan ber hi thluak lam atangin a ni a, thluak in a hriat ngai loh tawng chu kan hrethiam lo va ,inbiak pawp a harsat thu khuallian Pu R Romawia chuan sawiinIndia ramah tawng hrang a tam hle a, hnam tinin mahni tawng Script an nei vek a, a scrip hriat loh chuan an tawng hriatthiam a har a, Mizo te erawh hi chuan vanneih thlak takin kan tawng script hi English nen a in ang a, a tawng inang lo mahse a script a in an avangin awlsamna tam tak a awm a ti a.Hnam chak apiang tawng kha a darh chak a ni mai a,kan chhehvel hnamdang tawng te pawh kan la in kan copy nasa . Chutah chuan kan hnam tawng anga ngaih theih tam tak a awm tawh a.kan tawng tihhausak nan nge kan hman tih dal nan tih erawh chu ngaihtuah tham a nih thu a sawi bawk.
Tawng hi Economics nen a in thlung tlat a, kan va dawr tur leh kan mamawh te tawng kha kan zir leh hriatthiam a ngai a,chutiangin Politics nen pawh a inkungkaih zel thu Art & Culture Minister chuan sawiin Sorkar Department hrang hrang a bikin Educationah te chuan Hindi kan lalut nasa tawh a.Entirnan SSA,RSSY leh a dang te mahni tawng anga hman a nih tawh thu sawiin Mizo tawng tih hausak nan engtin nge heng hnamdang tawng te hi kan sengluh ang,kan Mizo tawng –Duhlian tawng humhalh zel chunga ngaihtuah a tha ani a ti.
Dr. Margaret Ch Zama vawiin programmea Moderator chuan sawi hawnna neiin Mizo tawng,Duhlian tawng ngei hi Mizo te chuan kan thiam in kan hre dik tur a ni a, chumi atan chuan amah ngei pawh in hetiang lam hawi lehkhabu leh Chanchinbu te a chhiar nasat thu sawiin tuna kan hnam dinhmun ah hian Mizo tawng hi a ral angem, nge a hausa zel zawk tih chhut fo a a tul thu leh Global language English te pawh tunah chuan Sap ho chauh tawng ani tawh bik lovin,hnam tin hian tualchher tawng-tawngthar lo piang chhuak te pawh an Dictionerary ah tamtak chu an telh tawh thu a sawi bawk.
Programme kaihruaitu Pu Sangdingliana,Secretary Art & Culture Department chuan khawvelah hian mahni tawng bil hi a awm tawh lova, Loan Words ...hnamdang tawng hawh in a inpawlh deuh vek tawh a,chu chuan tawng a ti hausa ani tiin hnamdang tawng hi an lamdan ang veka kan lo lam kha a tul ber lo va, kan hnam tawng thluka kan lo sawi ve mai khan tawng a ti hausa ani a ti.
‘Tawng dang Mizo tawnga seng luhte leh Mizo tawng inher danglam dan’ Pu C Chhuanvawra ziak vawiin hian zir ho ani in sawi ho leh zawhna leh chhanna te a hun hman a ni.
