Vawiin khan World Vision India, NABARD leh MHIP Zobawk Vengchhak leh Vengtlang Branch tangkawp buatsaih Seminar On Women Empowerment Through Self Help Group Zobawk Community Hall ah neih a ni. Lunglei Bawrhsap Pu Abhijit Vijay Chaudhary chu khuallian ni in a hmanpui.

He seminar hi Project Co-Ordinator WSHG Project Lunglei District Thanglianpaua Guite chuan kaihruai in, Pu Abhijit Vijay Chaudhary chuan hrauitute leh kalkhawm te hnenah lawmthu sawi in Womens Self Help Group Project hi Ministry Of Finance, Government Of India chuan NABARD kaltlang a scheme a siam leh a bultum (Sponsor) a ni a. India ram a District hnufual thlan chhuahte hmeichhia te kaltlang a chawikan na tura ruahmanna a ni a, Mizoram District thenkhat Lawngtlai, Saiha leh Lunglei tepawh an tel ve avangin Central Sawrkar ruahmanna angin District dang rual in WSHG Project hi Lunglei District ah pawh dt 29.Nov.2012 atangin kalpui tan a ni a. He Project in a tum ber hmeichhiate chawikan na, anmahni kaltlang a chhungkaw tin a eizawnna nghialnghet siam leh retheihna um bo a nih ang takin WSHG hnuai a member te theihtawp chhuah a he Project hmang hian dinchhuah tum theuh turin a chah a ni. He Project hmang a mahni ke a dingchhuak te a lawmpui thu sawi in, la ti mek te pawh hlawhtlinna an neih theih nan duhsakna a hlan a ni.

He Seminar ah hian Pu Lalrokunga Chhakchhuak, DDM, NABARD, Lunglei leh Pi Mary Lalromawii, Associate Professor, Gov't J.Buana College te chuan WSHG thiltum leh SHG nihphung te zirtirna nei in zawhna leh chhanna hun an hmang a ni.

NABARD hnuai ah hian Lunglei District chhung ah hian WSHG hi 886 din tawh a ni a, heng zing a 138 ten Bank kaltlang in loan in Rs.84,70,000.00 la in eizawnna atan heng Ar vulh, Vawk vulh, Puantah, Puangthui, Sumdawnna (Petty Business), Mombati siam, Bhujia siam leh Trade hrang hrang hmang in bul an tan mek a ni. Tin, he Project hnuai ah hian Lunglei District pumpui a chhungkaw 1000 ai a tam in Bank kaltlang in eizawnna nghialnghet neih tumin bul tan nan hma an la mek a ni.President, MHIP, Zobawk Vengchhak Branch Pi C.Lalthangi chuan lawmthu sawina hun a hmang.