Mizoram Chess Association (MCA) buatsaihin vawiin atanga 15th March, 2013 thleng awh tur 12th D. Baruah Chess Championship for Under 15, Under 11, Under 9 leh 36th Robula Chess Trophy chu Electric Veng YMA Hall-ah neih tan a ni a; he championship hi chhun dar 12.00 khan Sports Minister Pu Zodintluanga chuan a hawng.
Sports Minister chuan thuchah sawiin, “Mizoram Chess Association (MCA) in sawrkar policy kal mek, Catch Them Young chu a takin in tihlawhtling tih vawiina Championship khel tura naupang te te lo telte leh hman ni lawka neih zawh tak 6th North East Chess Championship-a Mizo naupang 3 laiin medal in han hlawhchhuak hian a tichiang a; Sports Minister ka nihna angin MCA chungah lawmthu ka sawi duh a. Dr. D. Baruah leh Er. Robula (L) te chhungkua inpekna hian Chess kheltute tan hmasawnna leh thathona tam tak a thlen tawh a; infiammite pawhin hetiang hun tha hi tih takzeta kan talent phochhuahna atan kan hmang tangkai tur a ni” a ti.
Pu Zodintluanga chuan infiamna kawng hrang hranga Mizoram infiammite khawvel hriata an inphochhuah theihna tura sawrkar rilru puthmang sawifiahin, “Mizoram hian infiamna kawng tinrengah talent kan kawl tih sawrkarin a hria a; chutiang talent-te chu Catch Them Young policy hnuaiah kum 3 kal ta chhung khan nasa takin kan hai-lang tawh a; North East leh National level-ah medal kan la zawih zawih ta mai a ni. National level atanga international level-a hnehna chang turin tunah hian VISION 2016 chu a bul kan tan leh tawh a; Olympics 2016-a Mizo infiammiten India ram ai an awh theih ngeina turin talent nei tha bikte chu game chi 9-ah kum tin ni 300 chhung kan hrual dawn a; heta sum senso tur hi North Eastern Council atangin kan hmu fel tawh a ni” a ti a. Khawvel huapa Mizoram infiammite kan inphochhuah tam theih huna infiammiten ram pawna coaching an kalna tur pawh sawrkar chuan ruahman chhoh zel a tum thu Sports Minister hian a sawi lang bawk a ni.
He Chess Championship-ah hian D. Baruah Chess Championship chu junior level tan category pathum-ah then a ni a; hetah hian naupang kum 15 hnuai lam mi 62 an tel a; Robula Chess Trophy hi senior tana ruahman niin, mi 60 in hming an pe a ni. He championship senso atan hian Er. Robula (L) te chhungkua chuan Rs 50,000 an thawh a; Dr. Debhajit Baruah te chhungkuain Rs 48,000 an thawh bawk a ni. MCA General Secretary Pu P. Lalchhuanpuia chuan report pe-in, 28th Feb.-7th March, 2013 chhunga North East Chess Championship neih zawh takah Catch Them Young hnuaia an naupang 3 : Lalfakzuala (Under 10) Gold Medal, L.H. Zothanmawii (Under 13) leh Lallawmzuala (under 7) ten Bronze Medal an lak thu a sawi. Vawiina Chess Championship hawnna inkhawm hi Pu Rochhunga Ralte, MCA President chuan a kaihruai a ni.
