No.3819/2020-2021

Siaha; August ni 5: Vawiin chawhma dar 10:30AM khan District Child Protection Unit, Siaha buatsaihin *Sensitization for Sponsorship and Foster Care Children and Parents on Child Protection in Siaha District* programme chu DCPU Conference Room-ah hlawhtling taka hman a ni. He programme hi Pu PP. Zalena, President, MTP(Mara Thyutlia Py) General Headquarters,Siaha chuan khuallian niin a hmanpui.

He hun hi Pi H. Lalrinfeli, Member, SFCAC chuan kaihhruaiin; Rev. Danny Chozah, Director, FG& CC, ECM, Siaha in hunserh a hmang a. Dr.David Zaitinvawra, DCPO, Siaha chuan Programme buatsaih chhan te chu kalkhawm te hnenah sawiin, Sponsorship leh Foster Care chungchang pawh a sawifiah nghal bawk a ni. Kum 2012 atang tawh khan ICPS Scheme hnuai atangin District Child Protection Unit, Siaha chuan Sponsorship leh Foster Care an lo pek chhuah tawh thu a sawiin, tun kum 2020 hian Sponsorship and Foster Care Approval Committee (SFCAC) kaltlangin naupang 42 hnenah tanpuina sum thlatin Rs 2000/- pek an nih thu a tarlang bawk.

Khuallian Pu PP. Zalena chuan thusawina neiin, District Child Protection Unit, Siaha ten kan Bible zirtirna dungthula mi harsa leh tanpui ngaite tanpuina hna ropui tak hmangaihna nen an thawk thin hi ropui a tih thu sawiin, kan naupangte tha taka an lo thanlen zel theih nan kan zavaia kan thawhho a pawimawh tak zet a ni, a ti bawk.

Nula Ephesi Hlychho, MTP Miss nilai mek leh Child Protection Ambassador ni bawk chuan thusawina neiin, India ram sawrkar hmalakna zarah kan Mara ramah ngei naupangte dikna chanvo humhimtu leh enkawltu bik atan kum 2012 khan District Child Protection Unit chu a lo ding a, kan ram hmasawn nan leh khawtlanga naupangte tha taka an thanlen nan kawng hrang hrangin District Child Protection Unit, Siaha a thawktute hian thahnem ngai leh rinawm takin an lo thawk thin a, an thawhrimna zarah kan ramah ngei pawh naupang enkawlna chungchangah kan khawtlang chuan bungthar kan kai mek a ni. Chuvangin an mamawhna hrang hrang hmuh thiampuia hemi kawnga thawktute kan theihna zawn theuh atanga kan lo tihchak ve a, an hnathawhna leh hmalakna hrang hrangte hi kan lo thlawp tlat a pawimawh hle a ni, a ti.

He hunah hian Dr. R. Hmingthanzuala, Member SFCAC, Pi P. Chaki, Member, SFCAC leh Aldrin J. Byhnapatha, LPO, DCPU Siaha te chuan Sponsorship leh Foster Care naupangte leh an nu leh pa te mawhphurhna leh hriattur pawimawh hrang hrangte sawizauna hun an hmang bawk.

Pu Lalthangmawia, Counsellor, DCPU, Siaha chuan lawmthu sawinain hun hi a tih tawp a ni.