Vawiin 28 April 2009 hian Lunglei district chhunga khaw 30 atanga YMA hruaitute tan ni hnih awh Sensitization workshop tan a ni. He workshop-ah hian Harm minimization chungchanga inzirtirna tluantling (Advocacy) chungchang zirho a ni.

He hmalakna hi UN agencies hrang hrang (UNAIDS, UNDP, UNCIEF leh UNODC) leh National AIDS Control Organization (NACO) te kum nga chhung (2007-2012) thawhhona tur project a ni a. He project hian NACO hmalaknaah thawhpuiin a thil tum “Kum 2012 thlenga India rama HIV hripui tih tawp leh tawlh kir tir” chungchangah pawh a hlawhtlin theihna tura theihtawp chhuaha tang tlang tura hmalakna a ni. He project hian thil tum hlawm 5 a nei a, a hlawm ngana hi UNODC bultuma state hrang hranga hmalakna tura tih a nih angin India hmarchhak state 4 - Nagaland, Manipur, Mizoram leh Nagaland-ah te UNODC hian hma a la mek a ni. Mizoram bikah chuan Mizoram State AIDS Control Society hnuaia HIV a tlakhniam theihna tura hmalakna awm mekte chhawmdawla tihchak leh thil tha lo thleng thei pumpelhna leh tih tlakhniamna (Harm minimization) kawnga inzirtirna tluantling (Advocacy) chungchanga hmalak hi a tum ber a ni.

Tunah hian a thawh khatna atan Lunglei leh Champhai district-ah te hma lak mek niin, NGO 2 ve ve thawhpui a ni a, district tinah hian NGO pakhatin khaw 30 zelah hma an la theuh a, tichuan avaiin tunah hian khaw 120 ah UNODC hian hemi kawngah hian hma a la mek a ni. NGO tinah hian thawktu 3 theuh pek an ni bawk. Tun tumah hian Lunglei district chhunga khaw 60 atanga YMA hruaitute tan a zawnin ni 2 chhung ve ve (28-29 April leh 30 April - 1 May 2009) hian riak luta training tum 2 neih a ni dawn a, hemi chungchanga mi thiam bikten zirtirna an pe ang. Tum khat training-ah hian khaw 30 atanga YMA hruaitute an tel ang.

He training hawnna inkhawm hi Central YMA Vice President, Pu Lalchungnunga khuallian a ni a, Pi Betty Lalthantluangi, Joint Director (TI) pawhin a hmanpui a, Pi Lalhlupuii Sailo, Project Officer, UNODC pawh in he training hi a ho bawk. He workshop hi UNODC bultumin FIWDC (Ferrando Integrated Women Development Centre), Peace Home, Durtlang ami ten buatsaihin anmahni hmunah neih a ni.