Vawiin ni 19.3.2010 khan Mizoram State Tobacco Control Society (MSTCS) buatsaihin I & PR Auditorium, Aizawl ah “Sensitization workshop for Heads of Educational Institution” neih a ni. He hunah hian Pi Lal Riliani, President, ISTH (M) chu khuallian niin, Pu F. Lalhluna, Jt. Director, School Education kaihhruaina hnuaiah he hun hi hman a ni. He hunah hian mi thiam bik ten zirtirna hrang hrang an pe a ni. Vaihlo hman kawngah Mizoram hian India ram State hrang hrangte khumin 1-na dinhmun a hauh mek a. National Family Health Survey in a tarlan danin zuk leh hmuam hmang hi Mizoram Mipa 83.1 % an awm a, hmeichhia bikah 60.8% an awm thung. Global Young Tobacco Survey 2001 a Mizoram School Class VIII - X naupang 2295 zinga survey an neih ah chuan 54 % hian vaihlo engemaw ber hi chu an hmang tih hriat a ni a, heng zinga 23 % hian meizuk an chinga 31 % hian vaihlo chi hrang hrang an hmang a ni tih hmuhchhuah ani. Zuk leh hmuam khapna dan (COTPA Rules) in a sawi angin school leh a chhehvel Yard 100 (300 ft.) huamchhungah vaihlo chi hrang hrang zawrh khap tlat a ni a, school neitu emaw school hotu dangte pawhin school bul hmun langsar laiah Board tarin vaihlo leh a kaihhnawih chi hrang hrang te Yard 100 (300 ft.) bialah zawrh phal a nilo tih an tar ngei tur a ni. Hemi bakah hian naupang kum 18 hnuai lam hnenah vaihlo leh kaihhnawih chi hrang hrangte hralh khap tlat ani tih te hi kan hriat a hun tawh hle a ni.
He workshop buatsaih a nihna chhan pakhat chu zirtirtuten vaihlo khuahkhirhna dan an hriat theih nan leh he vaihlo khuahkhirhna dan hmang hian school leh a vel a chak zawk a hma an lak theih nan a he hun hi buatsaih ani. Zirtirtute hi naupang kaihhruaina ah an pawimawh hle mai a naupang thununna kawngah leh zirtirna kawngah an pawimawh hle a ni. Zuk leh hmuam chungchanga inzirtirna ah pawh naupangte entawntlaka anmahni pawhin an tih loh a tul hle a ni. Zirlai naupangte chuan zirtirtute hi an entawn ber (Role Model) te an ni a, zirtirtuten vaihlo an hman loh chuan vaihlo that lohna in zirtirna kawngah pawh nasa takin hma an la thei a ni. Zirtirtu thenkhat te chuan school hungchhung ah mei an la zu khu hluah hluah mai a, an meizuk khu (secondhand smoke) in zirlai naupang te hriselna a tichhe thei a ni tih an hriat pawh a tul hle a ni.
