IWMP Serchhip-I (2009-2010) hnuaia sak mini-swimming pool, Soil & Water Conservation Department Complex, P&E Veng, Serchhip ami chu vawiin tlai dar thum khan District Bawrhsap Pu P. Lalchhuanga’n vantlang hman theih turin a hawng.
District bawrhsap chuan Serchhip khawpuia mini-swimming pool neih ani ve ta chu lawmawm atih thu sawiin, hemi atana hma la tu DRDA Project Director Pu Sangdingliana, MCS leh Pu R.lalramliana DS&WCO te chu fakin officer remhria leh a ngaihna hria an awmna hmunah chuan khawtlang tana chhenfakawm hnuhma hnutchhiah hmuh tur a awm fo thin a ni a ti a, swimming pool a hman tur tui petu PHE Department pawh fakin, mihringin taksa peng hrang hrang hnathawh in ang lo thiau mahse an lakhran san thei miah lo kan nei ang hian sawrkar department hrang hrangte pawh hi tumah in la hrang bik thei kan awm lova, tanrualna leh thawhhona tha a awm phawt chuan bungrua (asset) vantlang tana chhenfakawm tak tak tam tak a siam theih a ni a ti bawk. Thalaite hi darkar 24 lehkha zir reng tura ngaih chi an ni lova, taksa hrisel tur chuan insawizawite an mamawh a, hetiang atana hmun remchang awm hian thalaite talent haichhuah leh tihpun kawngah pawh kawng ro a sut ngei a beisei thu a sawi bawk.
Bawrhsap chuan sawrkar bungrua te duat leh dimdawi a tul thu sawiin, sawrkar chu mipui ta anih angin sawrkar bungrua chu mipui bungrua a ni a, mimal pakhat chauh tan nilovin mipui zawng zawng huap zella hman thiam a tul a, a enkawl kawngah pawh mipui zawng zawngin kan mawhphurhnate kan hriat a tul a ni a ti bawk. Bawrhsap chuan Dawngzawl rama District Park pawh tichangtlung tura ruahmanna chak taka kalpui mek anih thu a sawilang bawk.
Vawiin mini-swimming pool hawn inkhawm hi Pu P.Sangdingliana, Project Director, DRDA Serchhip-in a kaihruai a, Pu R.Lalramliana DS&WCO-in report pe in mini-swimming pool chu Soil & Water Conservation Department-in a enkawl tur thu a sawi a, report a a lan danin pool zau zawng hi a dung feet 54, a vang feet 19 a ni a, pool chanve hi feet 3 a thuk a ni a, a chanve dang hi feet 4 a thuk a ni bawk. Pool siam nan hian sumfai Rs nuaih li (4 lakhs) sen a ni a, a chhuat RCC a sak niin, a bang chu leirawhchan sak chi (hard brick) hmanga sak a ni. Hei bakah hian inthiarna mumal taka siam a ni a, thawmhnaw in thlakna hmun a awm bawk a, eirawngbawlna hmun tur choka a awm bawk, hei bakah hian inbualna tur pindan pawh siam leh tura ruahman mek a ni bawk.
Pool hi vantlangin a hman theih tura siam a ni a, picnic nan te leh tuihleuh zir nan te pawh a hman theih tur niin a enkawltu Department-in a hman dan tur ruahmanna uluk takin a siam bawk a ni. Swimming pool hman man hi kum 14 hnuai lam tan mipakhat zelah ` 10 a ni ang a, kum 14 aia upa tan mipakhat zelah ` 20 a ni ang. Pawl hova hmang duh tan mi panga chinah ` 300, mi 10 chinah ` 500, mi 20 chinah ` 800 leh mi 20 aia tamah ` 1,200 a ni ang a, Pathianni (Sunday) ah chuan khar a ni ang.
