Vawiin chawhnu dar 02:00 khan 28 Hrangturzo bial By2-Election atana chuh tum Nl. Lalawmpuii Chawngthu INC leh Pu H. Lalduhawma UDF-te nomination paper chu he Assembly bial Returning Officer leh Serchhip District Bawrhsap ni bawk Dr. Franklin Laltinkhuma’n candidate agent-te hriatpuiin a endik a, thil dik lo leh fel lo te awma a lan loh avangin heng mite hi official candidate atan a pawm a ni.

Heng candidate-te inhnuhdawh leh theih hun hnuhnung ber chu March 26, 2014 hi a ni a, inhnuk dawk an awm loh chuan hemi ni hian UDF Candidate Pu H. Lalduhawma tan hian official Symbol siamsak nghal a ni ang.