Vawiin hian Serchhip Bawrhsap Dr. Lalrozama, IAS hovin a pisaah Serchhip a Bank hrang hrang aiawh leh sawrkar official pawimawh ten January ni 19, 2017 a Bank Account Hawn Mela neih dan tur an rel.

Dr. Lalrozama, IAS chuan, sawrkar kalphung a inthlak zela, direct-benefit transfer akn uar tial tial a, khawvelah IT hman tangkaina a sang zel a, Bank Account neilova awm chu thil buaithlak tak a ni chho ta. Chutihlaiin mipui, Bank Account neih duh ngawih ngawih, a hranpaa Bank dawrna hun nei remchang thei lote pawh kan awm ve thei bawk a. Chung thilte ngaihtuah chung leh thuneitu sang zawkte atanga ngenna kan hmuh angin Bank Account hawn Mela hi buatsaih a ni dawn a ni, a ti. He mi ni hian awlsam taka Serchhip District chhunga Bank hrang hrangte a kan duhna berah Bank Account hawn theih a nih dawn avangin Serchhip khawchhung leh District chhung khaw danga mite pawhin rawn pan thei vek se a duhawm hle a ni, a ti.

Bank Account hawn MELA hi Dt 19.01.2017 zing dar 9:00 a.m atangin Serchhip DC Conference Hall ah neih tur a ni a, pan tu an tam dan a zirin DC Office tualah pawh dawhkan dah belh a ni ang. Serchhip District chhunga Bank awm ho, State Bank of India, Mizoram Rural Bank, Mizoram Co-operative Apex Bank leh UBI ten hetah hian Dawhkan an hawng ang a, Account hawng duh apiang tan Pawisa Deposit ngai lovin (Zero Balance) Account hi an hawn sak dawn a. Pawisa dah lut nghal duh tan pawh harsatna a awm chuang lo a ni.

Account hawng duhte chuang Passport photo copy hnih (2), Identity Proof atan heng zinga a engemaw ber (EPIC, PAN Card, Govt./Deptt ID siam chi hrim hrim, Driving License, Postal ID, Adhaar Card) Original Copy leh a Xerox Copy. Address Proof atan heng zinga a engemaw ber (Ration Card, Bill pekna lehkha mahni hming chuanna, VC Hriatpuina lehkha, Adhaar Card) Original leh Xerox Copy. Documents te hi Attested kher a ngai lovang. Adhaar Card hi Identity Proof ah leh Address Proof atan hman kawp theih a ni.

Bank Account hawngtu Signature a tul avangin mahni ngei kal tur a ni.

Serchhip a Bank Account la nei lote chu he hun remchang hmang tangkai turin kan inngen a ni.