Vawiin hian Serchhip DC Conference Hall ah Serchhip khaw chhunga YMA Branch hrang hrang 21 te hnenah Community Dust Bin 83 sem chhuah a ni a, District Sanitation Task Force Chairman Pi Sangchhin Chinzah, Bawrhsap ni bawk chuan a hlan a ni.

A semna inkhawm tawi buatsaihah Pi Sangchhin Chinzah chuan, Serchhip khua chu India ram khawpui fai inelna Swachh Survekshan, Northeast Zone ah 23 na niin khaw 220 zinga hetiang dinhmun luah thei khawpa faina lama hma kan sawn chhan hi VC leh YMA te vang ani a. Ni kuma Mizoram khawpui fai inelnaa parukna ni pha thei chauhvin kumina Northeast a 23 na leh Mizoram District khawpui zinga a langpha awm chhun ni bawk theia awm tur hian theih tawp in chhuah tih ka mit ngeiin ka hmu a, ka chhuang che u a ni, tiin YMA hruaitute leh khawtlang hruaitute chungah lawmthu a sawi a. Kuminah Mizoram khawpui inelna a awm leh ngei turah ngai ila, pakhatna lak ngei kan tum ang. Amaherawh chu lawmman lak tum vanga fai ngawt lovin faina hi kan nunphunga bet tlat zawk turin kan bei thung dawn a ni. Serchhip chak lohna lai ber khawpui paltlang tu NH 54 a side drain awm lo hi sawrkar Department hrang  hrang te pawisa thawhkhawm leh Mizoram Sanitation Task Force atanga sum kan dawn tlem azawngte nena tangkawpin tun thla chhunga side drain laih chhuah vek kan tum dawn a, chu hnaah pawh chuan nangni bawk hi phungbawma kan sawm tur in ni tih lo inhre lawk turin ka duh bawk che u a ni, a ti bawk.

Serchhip District Sanitation Task Force hian Mizoram Sanitation Task Force atanga Component hrang hrang atanga an sum hmuh te leh Serchhip a sawrkar Department hrang hrangte thawhkhawm Rs. 2 lakh vel hmangin tun thla chhunga hmalak tur ruahmanna an siam hlawm a. Chung zinga pakhat chu vawiia bawlhhlawh bawm 83 an sem tak hi a ni. Hei bakah hian Serchhip khawchhung NH 54 tluana side drain laih chhuah vek te, khawpui chhunga luikawr lian pahnih Hmawngawn leh Sesah lui thenfai te, khaw chhunga Wall Painting leh Hoarding engemawzat siam te, Media Campaign a tam thei ang ber neih te leh Anganwadi naupang atanga bawlhhlawh bawm hman tangkai dan nasa taka inzirtirte pawh a tel a ni.

Vawiina bawlhhlawh bawm semna inkhawm hi Pi Vanthangpuii, DUDO Serchhip in a kaihruaia, khaw chhunga YMA Branch 21 aiawh te leh Village Council member te an tel tha hle a ni.

 

Attachment

  • Loading attachment...