Vawiin chawhnu dar 2:00 khan District-Level Coordination Committee (DLCC) of Integrated Cooperative Development Project (ICDP) chu an Chairman, Serchhip Bawrhsap ni bawk Dr. Lalrozama, IAS pisa ah an thukhawm a, Cooperative Society te hmasawnna tura ruahmanna duan Integrated Cooperative Development Project" second phase kalpui dan tur leh first phase hmalakna an thlirho.

Vawiin meeting chuan ICDP kaltlanga tanpuina dawngtu Cooperative Society te hnathawh dan an thlirho a, tun chinah chuan an hmalakna te a that hlawm bakah Coperative Society member te thawhhona pawh a tha tlang hle in an hria a, an hnathawh dan report te pawh Secretary, Cooperation Department hnenah ziaka thlen an rel a, ICDP hnuaia loan la tute tan loan principal rulh na tura moratorium kum thum chhung ruahmanna awm sa chu Cooperative Society te tan harsatna a thlen thei dawn a an hriat vangin kum khata sawn turin ngenna siam a, State-Level Coordination Committee hnena thlen an rel bawk a ni.

Integrated Cooperative Development Project" hi Mizoram Sawrkar leh National Cooperative Development Corporation tangkawpin Mizorama Cooperative Society te tihhmasawnna tura ruahmanna an siam a ni a, kum li chhung project niin kum 2015-2016 atanga tan a ni a, kum 2018-2019 ah a tawp ang. He Project hian Siaha District tih loh Mizoram chhung District dang zawng a tuam chhuak vek a, ICDP First Phase kum 2015-2016 atan Serchhip District chhung atang Cooperative Society 35 hnenah tanpuina loan pek a ni a, loan pekchhuah zawng zawng belhkhawm hi Rs nuai 396.20 niin kum 8 chhung a rulh zawh tur a ni a, loan punna (interest rate) hi kum khatah 12.5% a ni a, Second Phase kum 2016-2017 chhunga beneficiary tur te pawh thlan fel tep an ni tawh bawk. Serchhip District ah hian Cooperative Society 100 an awm mek a ni.

District-Level Coordination Committee hi Integrated Cooperative Development Project (ICDP) hnathawh dan viltu leh he project kaihhnawih Sawrkar Department te nen thawhhona tha zawk a awm theihna tura din niin District Bawrhsap Chairman a ni a, Assistant Registrar of Cooperative Society chu Member-secretary a ni. Serchhip District chhunga DLCC member te chu District Agriculture Officer, District Fisheries Development Officer, District Veterinary Officer, District Industries Officer leh District Sericulture Officer te an ni.