Vawiin chawhma dar 11:00 khan Serchhip DC Conference Hall ah District-Level Standing Committee on Electoral Roll Revision, 2016 chu Serchhip SDO(Sadar) Pu L.Rinliana, MCS kaihhruaina hnuaiah an thukhawm a; Election Commission of India in Special Summary Revision of Photo Electoral Roll nei tura hriattirna a chhuah chungchang an ngaihtuah.

Election Commission of India thuchhuah ang chuan Special Summary Revision of Electoral Roll, 2016 atana qualifying date chu January ni 1, 2016 a ni a, hemi ni a kum 18 tling chin India khua leh tui diktak te chu Electoral Roll ah thun theih an ni a, a awmzia chu January ni 1, 1998 hma lam a piang an ni tur a ni. Electoral Roll a in thun thar bakah pem leh mitthi Electoral Roll atanga paih te, particulars diklo siam that te leh Constituency dang atanga Constituency danga insawn siamthat bakah Constituency chhunga Polling Station awmna thlak ngai siamthat te pawh tih fel nghal tur a ni a, Gram Sabha (Village Level Committee) pawh Polling Station tinah Booth level Officer te kaihhruaina in din a ni ang a, anni hian an polling Station chan chhung theuh a voter te enfiahin Electoral roll dik leh felfai neih theih nan hma an la bawk ang.

Election Commission of India chuan Electoral Roll Revision neih torah hian Serchhip District Observer atan Pu P.Lalchhuanga, IAS, Secretary, Trade&Commerce etc. chu a ruat a, Serchhip District chhungah hian Polling Station siam belh ngai a awm lova, East Lungdar-Polling Station atana hman mek East Lungdar Higher Secondary School aiah BDO Conference Hall hman tawh ni rawh se ti a rawtna chu Election Commission of India in a pawmpui tawh bawk a ni. Khawpuiah chuan Polling Station pakhatah voters 1400 thleng an awm thei a, thingthlangah erawh voters 1200 thleng an awm thei thung.

27-Tuikum (ST) Assembly Constituency chu polling station a tam avang leh khaw awmna in karki tak tak anih avanga AERO pakhat chauh tan vil a harsat avangin AERO pakhat dang ruat tura dilna Election Commission of India hnenah thlen a ni a, hei hi pawmsak niin SDC, Serchhip chu AERO atana ruatbelh a ni a; BDO, Serchhip nen ERO kaihhruaina hnuaiah thawk ang.

Ruahman dan chuan September ni 15, 2015 ah Draft Electoral Roll tarchhuah a ni ang a, October ni 14, 2015 thleng siamthat ngai lai siam tha tura dilna thehluh theih a ni ang a, November ni 16, 2015 ah siamthat ngai lai leh chinfel ngai zawng zawngte zawh fel vek tur a ni a, January ni 15, 2016 ah Electoral Roll thar tarchhuah tur a ni ang.

Electoral Roll hmanlai mekah Serchhip District a Assembly Constituency pathumah voters 46,238 (mipa-22,888, hmeichhia-23,350) an awm a, District-Level Standing Committee on Electoral Roll Revision, 2016 ah hian Serchhip DC chu Chairman niin Member Secretary chu Election Officer a ni a, Member atan District chhunga ERO leh AERO zawng zawng te, District Education Officer, District Information & Public Relations Officer, Serchhip a political party hrang hrang Block President theuh, Serchhip Sub-Headquarters YMA President leh Serchhip District MJA President te ruat an ni.

Election Officer Pu Lalhmansanga, MCS chuan Political Party te, NGO te leh Media te tawiawmna tel lo chuan hna thawh chak a harsat thu sawiin an tawiawmna leh thawhpuina tha a ngen nghal bawk a ni.