Vawiin chawhma dar 11:00 khan Serchhip DC’s Meeting Room ah Serchhip District Level Vigilance and Monitoring Committee neih a ni a, Committee Chairman Pu C.L.Ruala, Lok Sabha M.P., Co- Chairman Pu Lalhmingliana, Rajya Sabha M.P., Pu Lalthansanga MLA (Hrangturzo Constituency) ten he hun hi an hmanpui a, Sawrkar Laipuiin District chhung hmasawnna hna a ruahman chi hrang hrangte kalpui anih dan leh hmasawn dan chi hrang hrangte thlir ho a sawiho a ni.

Co-Chairman Pu Lalhmingliana chuan MGNREGS hna kalpui dan chungchanga VC te leh VEC te inkara harsatna awm thin chu thalo a tih thu leh BDO te chuan an bial chhunga hetiang harsatna hi lo zir chiang se a duh thu leh Meeting neih leh hmasa berah report theh lut tura a duh thu a sawi a ni.

DRDA kaltlanga hnathawh zing ami MGNREGS hnuaiah kum 2012-2013 khan Serchhip District ah ni 92 chhung inhlawhna siam anih thu report a ni a, hemi atan hian pawisa sanctioned Rs. Nuaih 2113.119/- atangin Rs. Nuaih 2106.37/- hman ral a ni a, ni 100 inhlawhna siam anih theih nan State Sawrkarin pawisa a thawh ve tur te a hun takah thawh thei thin se a that thu sawi lan a ni a, thuneitute hnenah hma la chak turin thlen tum a ni bawk. Kum 2012-2013 chhungin Serchhip R.D. Block huam chhungah Job Card 11060 pek chhuah a ni a, E.Lungdar R.D. Block huam chhungah Job Card 3196 pek chhuah a ni bawk.

IAY hnuaiah kum 2012-2013 chhungin Serchhip District ah In 70 sak a ni a, heng zinga 46 hi Serchhip R.D. Block hnuaia mi a ni a, a bak 24 hi E.Lungdar R.D. Block hnuai ami a ni.

Nirmal Bharat Abhiyan (NBA) hnuaiah March, 2013 thleng khan inthiarna (Toilets/Latrines) 7451 siam a ni tawh a, BPL chhungkaw 4398 (Serchhip R.D. Block – 2945, E.Lungdar R.D Block – 1453) tan inthiarna siam sak an ni tawh a, APL chhungkaw 2804 (Serchhip R.D. Block – 1870, E.Lungdar R.D Block – 934) tan siam a ni tawh bawk. School 80 (Serchhip R.D. Block – 58, E.Lungdar R.D Block – 22) ah leh Anganwadi Centre 92 (Serchhip R.D. Block – 68, E.Lungdar R.D Block – 24) ah inthiarna siam sak an ni a, Vantlang inthiarna hmun 77 (Serchhip R.D. Block – 67, E.Lungdar R.D Block – 10) ah siam ani tawh bawk. Khawfai lawmman dawng khaw 15 ((Serchhip R.D. Block – 10, E.Lungdar R.D Block – 5) an awm tawh bawk a ni.

NRDWP hnuaia pawisa dawn Rs. nuaih 1115.6077/- atangin Rs. Nuaih 1097.05071/- hman ani tawh a, hemi atana scheme siam hrang hrang 9 zinga 5 chu zawhfel tawh a ni a, a dang 4 chu hnathawh mek niin reilote ah thawh zawh vek anih beisei a ni.

National Social Assistance Programme hnuaiah Tar Pension (IGNOAPS) dawngtu mi 1625 an awm mek a, Tar pension la thar tura dilna 18 a awm mek bawk a ni. Hmeithai Pension (IGNWPS) dawngtu mi 54 an awm mek bawk a, Rualbanlo tanpuina (IGNDPS) dawng mi 35 an awm mek, National Family Benefit Scheme hnuaiah tanpuina pek tur Rs. 10000/- ni thin chu Rs. 20,000/- ah tih pun a ni a, hemi atan hian dilna lut chhungkaw 23 hnen atangin a awm a, mahse Sawrkar Laipuiin Serchhip district tan chhungkaw 12 chauh a ruahman sak avangin an zing atang hian chhungkaw 12 thlan chhuah ani tawh a ni.

He meeting-ah hian District Bawrhsap Pi Juhi Mukherjee, IAS chuan tunhnaia Aizawl Laipuitlanga in chim avanga chhiat tawk te a tawrhpui thu a sawi a, Serchhip District pawhin khuarel chhiat rupna hi tawng ve thei reng anih avangin hemi lo hmachhawn tur hian Sawrkar Department tin te ruahmanna mumal tak neih vek a tul thu a sawi a ni.

Vawiin meetingah hian Central Development Scheme hrang hrang khawihtu Department aiawhte an kal tha hle a, an hnathawhna kawnga harsatna an tawh te, an mamawhte leh an hlawhtlinna te sawi chhuah niin hma lak chhunzawm zel dan tur te pawh an sawiho a ni.