Vawiin chawhma khan Serchhip-a BNRGSK Hall-ah “Serchhip District Students’ Science Seminar 2013” hlawhtling taka neih a ni a, he Seminar ah hian 'Water Co-operation : issues and challenges' tih thupui hmangin zirlai naupang ten power point presentation intihsiakna an nei a ni.

Students’ Science Seminar hawng tu District Bawrhsap, Pi Juhi Mukherjee, IAS chuan thusawiin, mihringte hi Tui tel lova kan awm theih loh thu leh mihring tana tui pawimawh zia uar taka sawiin, khawvel pum hmun thum a thena hmun hnih zet chu tui a ni chungin mihring te ei leh in-a hman tlak chu tlemte chauh a ni a, chuvangin kan tui neih te kan humhalh that a kan renchem thiam a ngai hle a ni a ti bawk.

Vawiin a Students’ Science Seminar hi Pu C. Zolawma, District Education Officer chuan kaihruaiin he hunah hian Serchhip District chhunga High School 9 atangin zirlai 16 an tel a, heng zirlai te hian 'Water Co-operation : issues and challenges' tih thupui hmang hian Powerpoint presentation intihsiakna an nei a, a pumpui ah Malsawmzuala Royte, Class- X, St. Peter’s High School, Chhingchhip chu pakhatna niin; P.C. Remruatpuii, Class- IX, Marian High School, Serchhip chu pahnihna a ni a, a dang zawng participants 14 hnenah Consolation Prize pek vek an ni. Lawmman te hi Pu Lalhmangaiha Chawngthu, Principal, Govt. Serchhip College chuan a hlan a ni.

Vawiin a Serchhip District Students’ Science Seminar-a titha thlanchhuah mi 2 te hian Sept. 6, 2013-a State Level Students’ Seminar neih turah Serchhip District ai an awh dawn a, heta titha thlanchhuah leh te hian National Students’ Science Seminar kumin October thla a neih turah Mizoram ai an awh leh dawn bawk a ni.