Vawiin chawhma dar 10 khan Serchhip DC Office Chamber-ah District Bawrhsap, District Election Officer ni bawk Pi Juhi Mukherjee, IAS hovin Election Officials, Political Party aiawhte leh NGO a hrang hrang aiawh ten July ni 30&31 a First-Level Checking of Electronic Voting Machines neih tur atana inpuahchah dan sawihovin an thukhawm.

Serchhip District Election Officer Pi Juhi Mukherjee chuan Election Observer Pu P.Lalchhuanga, IAS hovin Political Party aiawhte leh NGO aiawhten July ni 30 ah inkawmhona hun an hmang ang a, hemi zawh hian DC Conference Hall-ah kumin kumtawp Inthlanpuia hman tur Electronic Voting Machines te endikna hun an hman dawn thu a sawi a, venhimna uluk tak hnuaiah a felfai thei ang bera he hun hi hman anih tur thu a sawi bawk a ni.

First Level Checking of EVM neih hunah hian Electronics Corporation of India Ltd. (ECIL) engineer pahnih an rawn kal dawn a, inthlan hnuhnung bera EVM hman te pawh endikin, data leh address tag etc. awm zawng zawng pawh engineer te hian an tireh vek ang a, a bal tihfai pawh anmahniin an buaipui vek ang a, midangin khawih ve a thiang dawn lova, amaherawh chu heng an buaipui lai hian an bulah awmin a vil reng theih dawn a ni. ECIL engineer ten EVM khawl te an endik hnu a hman tlak an tih hnu ah, EVM ho zinga 10% chu random-in political party aiawh ten an thlang ang a, hengah te hian Mock-Poll neih a ni ang a, EVM tinah vote 1000 theuh an thlak ang a, heng result te hi print chhuah anih hnu a, Political Party hrang hrang aiawh ten a ngaihthat thlak e an tih hnu ah chauh pink seal hmangin engineer te hian an seal thlap ang a, chumi hnu ah EVM Warehouse ah Police venhimna-in dah that nghal a ni ang.

First Level Checking of EVM neih hunah hian Election Officials te bak ah Sawrkarin National Party emaw, State level Political Party a a pawm te chauh an tel phal a ni dawn a, Identity Card felfai tak siam a ngaih vangin Serchhip District chhunga Political Party Block hrang hrang President ten an Block aiawh tur atana an thlan te hming leh passport size photo te ziakin July ni 29 aia tlai lovah Serchhip DC hnenah hriattir tur a ni ang a, ID Card hi ni 30 ah FLC neih hma in pek chhuah an ni ang. Venhimna Mizoram police kaihhruaina hnuaiah uluk taka kalpui ani dawn a, FLC of EVM neihna hmunah hian electronic bungrua, camera, pen etc ken luh phal ani dawn lova; chanchinbu mi te pawh Hall chhungah luh phalsak an ni dawn lova, amaherawh chu thil pawimawh hriattur tul bik te chu Nodal Officer, FLC for EVM in a hriattir thin dawn a ni.

Serchhip District chhunga Assembly Constituency 3 tan hian EVM 90 awm tura ruahman a ni a, heng zingah hian Ballot Unit 84 leh Control Unit 83 hmantlakin a awm a, abak mamawh hi FLC of EVM neih hmain a thlengkim hman tur thu sawi lan a ni a, Serchhip District-a Polling Station 77 tan bakah, EVM Training pekna tur leh a chhiat palh thut a thlakna tur dahthat a ni ang.

First Level Checking of EVM neih hunah hian Observer atan Pu H.Laizika, MCS, Controller of Printing & Stationery ruat a ni a, Nodal Officer atan Pu Lalsangliana, MCS, Addl. DC Serchhip ruat a ni bawk.