Vawiin chawhma dar 11:30 khan SSA Mission, Serchhip bultumin Serchhip District a Zirna In zawng zawngah “I Kutah khan Thiltihtheihna a awm a ni” (The Power Is In Your hand) tih thupuia hmangin khawvel pum huap “Kut Silfai Runpui Ni” (Global Handwashing Day-2013) hman a ni a, Government Middle School, New Serchhip ah he ni pual hian abika inkhawm buatsaih niin District Bawrhsap Pi Juhi Mukherjee, IAS chuan a hmanpui a ni.

Bawrhsap Pi Juhi Mukherjee chuan kut fai leh thianghlim neih chu hrisel nan a pawimawh zia sawiin, sahbawn nena kut silfai hi natna hrik laka invenna pawimawh ber leh awlsam ber pakhat anih thu a sawi a, School naupang ten midday meal Schoola an ei thin avangin naupangten kut fai taka sil nachang an hriat theih nan zirtir uluk an pawimawha a hriat thu sawiin District thuneitute pawhin hei hi ngaihpawimawh thar tul hle a a hriat thu a sawi bawk. Bawrhsap chuan India Sawrkarin Zirlaite tan Midday Meal te, Weekly Iron-Folic Acid Supplementation (WIFS) te, Kut fai leh thianghlim nei tura inzirtirna leh thildang chi hrang hrang a ruahman dan atang hian zirlai naupangte a ngaihpawimawhzia leh tuna zirlai naupangte hi India ram tana an la pawimawh tur zia a hriat lawk vang a ni a ti a, zirlaite leh zirtirtute pawh kut te fai tak leh thianghlim taka enkawla hriselna tha tak nei zel tura fuih chungin duhsakna a hlan nghal a ni.

Global Handwashing Day hi kum 2008 atang khan hman tan niin, kum tin October ni 15 a hman ziah a ni a; kawthalo leh thawhah avanga naupang thi tam lutuk tih tlem anih theih nana hmalakna pakhat niin, zirmite zirchianna ah chuan sahbawn nena kut fai taka sil anih chuan naupan laia thi zat hi za a sawmnga dawnin a tlahniam thei a ni.

Pu C. Lalthanzira, DPC (SSA), Serchhip kaihhruai Global Hand Washing Day – 2013, puala inkhawmah hian Dr. Albert Lalhminghlua, M.O., JNM Hospital, Serchhip hnen atangin kut silfai pawimawhna leh silfai loh palh avanga natna mihringin a tawn theih te, kut silfai dan tur te zirtirna ngaihthlak a ni a, inkhawm zawh hian School Choka ah kut silfai dan tur naupang hnenah a taka entir a ni a, District Bawrhsap pawhin naupangte chu kut silfai puiin a tih dan tur te a zirtir bawk a, hemi hnu hian District Bawrhsap ho hian zirlai naupang ten chawchhun (Midday Meal) an fak ho a ni.