Vawiin chawhma dar 10:30 khan  Serchhip District Legal Services Authority buatsaihin Serchhip DC Meeting Room-ah Hmeichhia leh Naupangte himna chungchang inzirtirna "One Day Seminar on Women & Child Rights" neih a ni a, Serchhip District Bawrhsap Pi Juhi Mukherjee, IAS chuan khuallian niin he hun hi a hmanpui.

Bawrhsap Pi Juhi Mukherjee chuan vawiina an thil zir turte hi dan pawimawh tak tak vek an ni a,  mipuiten harsatna an tawh pawhin heng dan hmang hian an hriat lohte hrilh hria a, tanpui turin kalkhawmte a chah a, Hmeichhe chunga hlei lennate hi tupawhin kan tawk thei a ni tih hriaa, min tanpui theitu dan kan hriat hi a tul a ni ati. The Mizo Marriage Divorce andInheritance of Property Act 2014 phei chu dan tha tak anih thu a sawi a. Hmeichhiaten an theih tawkin lo lamah te leh bazarah te hna an thawk a, inthenna an tawhin kut bengin an chhuak leh si thin tih a hriatin a rilru nat thin thu a sawi a, he dan tha tak hian chung harsatna lakah chuan a veng thei tawh dawn a ni tih a sawiin, Kalkhawmte chu thahnem ngai taka an thil zir turte zir a, midangte tanpuitu ni thei turin a chah a ni.

Seminar kaihruaitu Pi Lalrochami Ralte, MJS, Secretary DLSA Serchhip pawhin inlawmna thu sawiin, dan chungchang a sawifiah a, Seminara lo kalte chu khawtlang an kaihhruainaahte leh rawng an bawlna kawnga hmang tangkai turte, mipuite tanpuitu leh an hriat loh te an hrilh hriat theih nan sawm an nih thu a sawi a. Dan kan hriat loh avangin khawtlang kan hruainaah te pawh dan kan bawhchhe fo thin a ni a ti a, a bik takin Hmeichhe chunga hlei lenna chungchang ah te dan kan hriat hi a tul hle a ni a ti.

Pu T. Lalnunsiama Advocate in kalkhawmte chu zirtirna a pe a, Seminar hi hun hnihna then niin, chawhma lamah Juvenile Justice Act leh POCSO Act chungchang a zirtir a, chawhnu lamah Protection of Women from Domestic Voilence Act 2006 leh The Mizo Marriage Divorce and Inheritance of Property Act 2014 chungchang an zir ho leh hnuin sawi hona hun hman a ni.

He Seminar ah hian Khawtlang hruaitu VC te, Zirtirtu te, Pastor te, Chhawmdawlna in enkawltute, Para Legal Volunteer te leh chanchinbu mite sawm an ni a, Serchhip khaw chhung bakah North Vanlaiphai leh E. Lungdar atangin an tel tha hle a ni.