Vawiin nileng khan Horticulture Department, Serchhip Division buatsaihin Serchhip Hmar Veng YMA Hall ah an hmalakna pakhat, “Centre of Excellence” hnuaia “Lunglei Zau” chhunga hma la tur Huan neitute tan Terrace siam dan, Sapthei chin dan leh thlasik thlai chi hrang hrang chin dan inzirtir a ni.

Vawiin Training hi Pu Lalhmangaiha, DHO in a kaihruai a, Lunglei Zau chhunga hma la tur Huan neitu mi 60 vel telin, Terrace siam dan hi Pi F.Zorinsangi, ADHO in a zirtir a, Sapthei chin dan hi Pi Lucy Zaithangpuii, HDO in zirtirin Pu R.Lalmuanpuia, FC hnen atangin thlasik thlai chi hrang hrang chin dan zirtirna ngaihthlak a ni bawk. Training zawh anih hnu hian sawihona leh inkawmhona hun hman niin farmer te leh official te’n thlai chin chungchanga an harsatna tawh chi hrang hrang te an sawiho bakah a sutkian dan tur te an sawiho a, farmer te chuan Sawrkarin hetiang hun tha a buatsaih sak hi lawmawm an tih thu leh an thil zir tharte chuan phurna nasa tak a pek thu an sawi a ni.

Centre of Excellence hnuaia Sawrkar tanpuina kaltlanga Lunglei Zau chhunga hma la tur te chu Sawrkarin ruahmanna fel tak siampui in Serthlum (M.Orange) Acre 1 hmunah kung 200 zel phun tur leh a khur pawh ngil taka teh thlap a lai turin a hriattir a, a kar inhlat zawng pawh 3.6 m X 3.6 m a zau a siam turin a hrilh a, Sapthei (Passion Fruit) chu Acre chanve hmunah kung 300 phun turin a ruahman bawk a, a kung leh a tlar inhlat dan pawh 2.1 m X 2.1 m a siam turin a ti a, Thlai chinna turin terrace 4000 square meter theuh laih tura ruahman a ni bawk a, Thlai chinna atan Green House (60 sqm) bakah thlai chawmna tur tuikhuah te leh Thlam (Farm House) mumal taka sa theuh turin hma a lakpui bawk a ni.

Pu Lalhmangaiha, DHO chuan Centre of Excellence hi a hlawhtlin ngei theihna turin beneficiary zawng zawngte chu Sawrkar duh dan ang zawm turin leh, a hun taka hma la a che fel thlap thlap zel tura inbuatsaih tur leh hmalakna tikhaihlak zawnga awm lo turin a ngen a, hlawhtlinna an hmuh tlan theuh theih nana theihtawp chhuah theuh turin a ngen nghal bawk a ni.