Vawiin chawhnu dar 1:00 khan Serchhip DC Meeting Room-ah Mizoram State Livelihood Mission hnuaia Serchhip District-Level Co-Ordination Committee chuan an Chairman Pi Juhi Mukherjee, IAS hovin tunhnai ni 45 kal ta chhunga Community Resource Person ten an Block huamchhunga hma an lak dan report a thlirlet a, Serchhip District a RD Block pahnih Serchhip leh East Lungdar a MzSRLM hnathawktute leh Community Resource Person (CRP) te bakah Pi Smita Jacob, State Anchor, leh Pu FJ Liantluanga, MCS, Mission Director ten he hun hi an hmanpui a, Andhra Pradesh atang External Community Resource Person engemawzat an tel bawk.

Vawiina report an pek ah East Lungdar R.D. Block a CRP te hian ni 45 chhungin khaw hrang hrang pali - East Lungdar, Khawlailung, Bawktlang leh Piler tuam hmanin Self-Help Group thar 37 (East Lungdar-10, Khawlailung-13, Bawktlang-5, Piler-9) an din a, Women Activists 28 (East Lungdar-10, Khawlailung-10, Bawktlang-3, Piler-5) an nei thar bawk.

Serchhip R.D. Block a CRP te chuan ni 45 chhungin khaw hrang hrang panga – Keitum, Baktawng, Chhingchhip, Khumtung leh Bungtlang te an tuam chhuak a Self-Help Group thar 42 (Keitum-5, Baktawng-14, Chhingchhip-11, Khumtung-2, Bungtlang-10) an din a ni.

CRP ten khaw hrang hrang an tlawhnaah mipui ten an dawngsawng tha thin chu lawmawm an tih thu an sawi a, inkalpawhna kawng thalo leh Rural Bank awmna khua a tamloh avanga khaw thenkhata SHG ten Savings bank Account hawng tura hla tak tak kal ngai chu an tan harsatna anih thu leh Bank Account hawng tura Rs. 500/- bakah senso neuh neuh dang a awm avanga harsatna an tawh chu sutkian dan awm theise an duh thu an sawi a, State danga an tih ang a SHG te tana no-frills account neih theih dan awm se an duh thu an sawi bawk a ni.

Andhra Pradesh atanga CRP rawn kal te pawhin Mizoram chu chi leh chi inthliarna awmlohna (Classless Society) anih avang leh khawtlang mipuite inlungrualna hmun anih avangin SHG tha taka kalpui theihna tur atana duhthusam ni a an hriat thu an sawi a, khaw hrang hrang an fanna ah an duh anga mipuite an kawm theih loh chhan chu chhun lama an feh vek avang leh zan lama kohhran leh khawtlang programme tam lutuk vang ni a an hriat thu an sawi a ni. Hei bakah hian Self-Help Group din chungchangah hmeichhe thenkhat chu an pasal ten tel an phal lo thin tih sawiin hemi chungchanga inzirtirna uar thar a tul thu an sawi bawk.

Self-Help Group hi hmeichhiate dinhmun chawisanna kawng leh an khawhawi tih zau a, sum leh pai khawl leh vawn chungchangah te bakah anmahni inrintawkna an neih theih nana ruahman a ni a, Bank account hawn dan te, Account enkawl dan leh ziahfel dan te bakah thil tangkai dang tam tak an inzirtir thin a ni.

National Rural Livelihoods Mission (NRLM) hi Sorkar Laipui-a Ministry of Rural Development in thingtlang mipui ten eizawnna ngelnghet an neih theih nan leh thingtlang-a mirethei te chawikan nan programme a kalpui thin Swarnjayanti Gram Swarozgar Yojana (SGSY) a hma aia changtlung leh huap zau zawka kalpui a nih theih nan a duan thar a ni a. Hemi zulzui hian state sawrkar zawng zawngte chu Mission dina bultan tura tih an ni a, Mizoram hi Hmarchhak biala a bultan hmasa ber a ni.

MzSRLM thawhkhatna (Intensive Phase) kaltlang hian Serchhip District-a Serchhip leh East Lungdar RD Block leh Kolasib District-a Thingdawl leh Bilkhawthlir RD Block leh ah te bultan a ni.

DLCC Chairman leh District Bawhsap ni bawk Pi Juhi Mukherjee, IAS pawhin MzSRLM chu Sawrkar Laipui ruahmanna a kalpui anih avangin mipuite tan hlauhawm a awmloh thu a sawi a, thingtlang miretheite chawikanna tura duhsak taka ruahmanna siam anih avanga chhawr tangkai ngei ngei tura mipuite zirtir uar lehzual ngai a tih thu sawiin Cluster/Block/District leh State Level a thawktu zawng zawng inpekna leh thahnemngaihna chu fakawm atih thu sawiin, an hnathawh danah sawisel tur a hriatloh thu leh an harsatna te pawh sutkian sak tura theihtawp a chhuah tur thu a sawi a; Andhra Pradesh atanga Community Resource Person rawn kalte chu fakin an in leh lo, chhungte kalsana phur tak leh thahnemngaitaka mizo mipuite SHG chungchang zirtir tura an rawn kal chu lawmthu a hrilh bawk a ni.

Community Resource Person te hi karhnih chhung an chawlh hnu ah an Bial chhunga an khaw tlawh hmabak te tlawh chhuak turin an fehchhuak lehnghal dawn a ni.