Vawiin hian Serchhip DC Conference Hall ah National Girl Child Day, 2019 leh Beti Bachao Bati Padhao Week, 2019 hmanna a ruala buatsaih a ni a. Serchhip Bawrhsap Pi Sangchhin Chinzah chu khuallian a ni.

He hun Pu Chuauhnuna, Addl DC kaihhruaiah hian Pi Sangchhin Chinzah chuan, India sawrkarin a mipuite tana hma a lakna thatzia leh India mi kan nih avanga kan vanneih zia sawiin, nuin min pai tan tirh atanga kan puitlin thlengin tanpuina chi hrang hrang min pe a. Kan eizawnna kawngah pawh min umzui zel a, hmeichhiate phei chu nasa zawka duat leh venhim kan ni, a ti a. Beti Bachao, Beti Padhao programme chu Ministry of Women & Child Development in hmeichhe naupangte venhimna leh zirna lama tihhmasawnna atana District huapa hma a lakna programme a nih thusawiin, he hmalakna atan hian Serchhip District min thlan angin tunah hian kawng hrang hranga hmalak mek a nih thu a sawi a ni. Bawrhsap chuan, fapate tih theih ang zawng zawng hi fanuten an ti ve vek thei lo mai thei a, fanute tih theih zawng zawng pawh fapaten an ti thei vek bik chuang lo, kan theihna hi Pathian min siam danah a inang vek lovang, amaherawh chu kan chanvo erawh chu a inang tlang a ni tih erawh kan hriatreng a tha a ni, a ti a. Fanute duata, venghima, zirna kawnga lo kaihhruai puitlin ngei tum turin nu leh pate a ngen a ni.

Khuallian hian BBBP hmanga Education Department nena tangruala hmalakna peng pakhat, naupang school chawl tawh, school lut leh tura sawm chhuah (re-enroll student) mi pasarih (7)  hnenah leh a sawm lut lehtu zirtirtute hnenah lawmman a hlan nghal a ni.

He hunah hian BBBP Nodal Officer, Pu H. Lalhruaitluanga, MCS in BBBP Serchhip District hmalakna hnuaia hnathawh tawh leh hmachhawp hrang hrangte a tarlang a. Chairman Pu Chuauhnuna, Addl. DC kaihhruaina hnuaiah he ni hmang tura kalkhawm ten ‘fanu’ duat taka enkawla zirna lama chher puitlin tum ngei tura intiamna an nei rual a ni. Pu R. Vanrengpuia SDO(Sadar) in lawmthu sawina hun hmangin he hun hi a khar a ni.

National Girl Child Day, 2019 pual vek hian BBBP thawktuten school pathum, Presbyterian English School, Little Flower Convent School leh Chawngbuangi Memorial School ah te naupangte nen hun an hmang ho bawk a ni.