Vawiin khan Govt. Serchhip College-a History Department buatsaihin Serchhip DC's Conference Hall-ah 'Mizoram : Origins, Myths, Legends and Socio-Political Development' tih thupui hmangin National Seminar neih a ni a, he hunah hian Mizoram Univeristy leh Mizoram College hrang hranga mithiam thlan chhuah te thuziak an zirho a ni.
He Seminar hmanpuitu Serchhip District Bawrhsap, Pu P. Lalchhuanga chuan University Grant Commission (UGC) bul tum, Mizo History tihchangtlun leh tih hausak a nih theih nana Serchhip hmunah ngei National Seminar buatsaih a ni chu lawmawm a tih thu a sawi a, Mizote chu kan History chhui chianin kan la hausa tawklo hle nia a hriat thu pawh sawiin, hemi kawngah hian Mizo Historian te chuan tan an lak deuh deuh tula a hriat thu a sawi a, he huna kal khawm zirlaite chu an lehkha zir te an zirlai pass nan chauh a zir lova hriat belh leh hriat zau duhna kawnga tuihalna nen zir turin a chah a. Zirlaite chu History te thawnthu chhiara chiar liam mai lo tur leh History-a thil zir tur leh entawn tlak te zirchhuahna atana hman tum thin turin a chah bawk a, Mizote chu kan thatchiat avangin thiam kan inti hma lutuk thin nia a hriat thu a sawi bawk.
He Seminar hawnna hunah hian Pu K. Remthanga, Principal, Govt. Serchhip College pawhin thu sawiin tun tum hi Govt. Serchhip College in Seminar emaw, Conference emaw an buatsaih tum khatna a nih thu sawiin, hetianga Seminar buatsaih hi zirlaite kawng tha kawhhmuhna leh an zirlai a nasa taka puitu anih avangin Department dang te pawhin entawnin buatsaih ve thin se a duh thu a sawi bawk.
