Vawiin nileng khan NLUP Implementing Board leh NLUP Cell, DC’s Office, Serchhip tangkawpte buatsaihin Serchhip DC’s Conference Hall-ah Serchhip District chhunga NLUP kaltlanga hnathawhte endik chungchang zirhona “Workshop On Monitoring Of NLUP Works” neih a ni a, he hun hi Mizoram Chief Minister Pu Lal Thanhawla chuan khuallian niin a hmanpui a ni.

Chief Minister chuan NLUP lo in tan dan sawiin, Mizoram buai kha mipuiten an tuar nasa em em a, remna ziah anih hnu khan buai laia in leh lo chan te tan bul tan that a ngai a, mipuite harsatna nasa takin a tlakbuak avangin mang a ang em em a, kuthnathawktu taima tak tak tehe harsatna lak ata an talchhuah theih nan rahbi tuk sak a eizawnna kawng sial sak a tul avangin chhungkaw sing tel Congress Ministry hmasa zawk chuan NLUP hmangin a lo tanpui tawh a, chhungkaw tam tak rambuai vanga in leh lo chan te tan inchung khuhna tur rangva pawh NLUP hmasa zawk kaltlanga pek an nih thu a sawilang bawk.

Chief Minister chuan NLUP Programme kalpui mek chu Pathian lam tang programme anih avangin mipuite pawhin Pathian lamah kan tang em ? tih inzawt chunga an dawnsawn thiam a ngaih thu a sawi a, rinawmna, dikna, taimakna leh Pathian tihna tel lova dawngtute chuan an dinchhuahpui dawnlo ani tih sawilangin NLUP hmasa zawk pawh a titha duhlo tam tak an awm laiin khatih laia thahnemngai taka tanla te chuan tun thlengin dinchhuahpui nan an hman thu a sawi bawk.

Chief Minister chuan tun tuma NLUP kalpui mek hi ‘NLUP Changtlung Zawk’ tih anih nachhan chu NLUP hmasa zawk kalpui anih tuma an lo tawnhriat tawhte atanga a fuhlo lai siamtha a kalpui anih tak vang anih thu sawiin mipuite leh sawrkar hnathawkte pawh uluk taka zirtirna pek zel an nih tawh thu a sawi bawk. NLUP hlawhtlinpui tur chuan thatchhiat leh zawmthawt hi a inhmeh lo ani tih sawiin Sawrkar hnathawkte leh kuthnathawktute pawhin kan hnathawh dan kalphung (work culture) kan siamthat a ngai ani tih sawiin Mizo thalaite chu hnathawh tur a vang ti a beidawng a awm ai chuan mizoram pawn lam mi mi nuaih hnih chuang Mizoram chhunga hnathawh tur hmu rengte hi in enfiah nan hmang zawk turin a chah bawk.

Chief Minister chuan NLUP thatna leh pawimawhna hria a kohhran ten an tupui chu lawmawm a tih thu sawiin, an ni nmai bakah Sawrkar hnathawkte leh tlawmngai pawl hrang hrangte pawhin tan an la nasa a, hlawhchham duhlohna thinlung an pu a hmu chuan phurna thar a pe leh thin tih a sawi bawk. Mahse theihtawp an chhuah chung pawha a dawngtu thenkhat ten NLUP an dawnsawn danah lungawi har tih chang a neih thin thu a sawi bawk a, NLUP sum hi Public Fund anih avangin a hmanna tur nilova hman chu dan bawhchhiatna anih avangin a dawngtute pawh dan in a vil reng dawn tih a sawi bawk a  ni.

Chief Minister chuan NLUP chu Mizoram intodelhna kawng atana rahbi pawimawh anih thu sawiin tun dinhmunah thlatin phai lam atanga buhfai lei nan sawrkarin cheng vaibelchhe 14 vel a hman ziah thu sawiin NLUP hnuaiah chuan heng sum zawng zawngte hi Mizoram kuthnathawktute kut a lut tura duhthusam anih thu a sawi a, kum 5-10 chhunga Zoram pumpui ei leh bara intodelh tir chu a tum ber anih thu a sawi bawk a ni.

Chief Minister hian Kaladan Multi-Purpose Project atan kum 1996 khan Myanmar Sawrkar nen inremna an lo siam tawh thu sawiin, Mizoram chhunga tuialhthei laichhuak tura hma an lak tawh dan pawh sawi langin  kum 1996 ah khan ONGC ten en inremna an lo siam tawh thun leh ONGC te pawhin Bilkhawthlir leh Thingdawl daiah hma an lo lak daih tawh thu a sawi bawk.

Vawiin NLUP Workshop hi hun hnih ah then niin chawhma hunah Chief minister hovin inkhawmna neih a ni a, chawhnu hunah hian NLUP hnuaia hnathawhte endik chungchang zirhona (workshop) neih a ni a, he hun hi Pu Lalhmangaiha, DHO & Secretary, Serchhip District-Level NLUP Implementing Committee in a kaihruai a, Pu Zorammuana, Secretary, NLUP Implementing Board-in he hun hi hmanpuiin Serchhip District chhunga khaw hrang hrang aiawh kalkhawmte chu NLUP endik chungchanga hmalak dan turte leh an hriat tur pawimawh te zirtirna a pe a, hemi hnu hian sawihona hun hman niin NLUP endik chungchanga harsatna leh mamawh an neihte sawihoa hmalak chhunzawm zel dan tur te ngaihtuah ho a ni. He hun hi Pu Robert C. Lalhmangaiha, SDC & Nodal Officer, NLUP Serchhip District chuan lawmthu sawiin a khar a ni.

Vawiin vek khan Chief Minister Pu lal Thanhawla leh a nupui Pi Lal Riliani te chuan Serchhip DC Bungalow luhna gate sir tawn tawnah thing tiak an phun ve ve a, an thingphun hi Araucaria Kookii (Australia) a ni a, Chief Minister  hi zaninah Serchhip ah riakin naktuk zing tukthuan eikhamah Lunglei lam panin a chhuak leh ang.

Chief Minister hi Pu H.Zothangliana, Parliamentary Secretary-in a tawiawm a ni.