Vawiin hian Zoluti Hall Serchhip Vengchungah Village Health Sanitation & Nutrition Committee huaihawtin Nutrition Day hman a ni.

He hunah hian Pi Mary Zoramsangi, Health Co-ordinator, Zoram Entu Pawl Serchhip chuan thu sawiin naupang ten chaw tha an mamawh chi hrang hrangte leh chaw tha pai ei tur chi hrang hrangte a sawi a, phai lam atanga chaw eitur siamsa dawra an zawrh thin te ai hian thlai hring tharlam hi a hrisel zawk a, naupangte ei atana thlanawm zawk ani a ti. Naupangten anmahni mai chuan in vawnfai nachang an hriat loh leh an thiam loh avangin nu leh paten kan fate faina kawngah theihtawpin kan kaihruai tur a ni a, chu chuan an hriselna leh an puitlin thlenga an nun dan turah thui takin awmzia a nei a ni a ti bawk.

Thusawitu dang Pi Lalsiampuii Tochhawng, District Child Protection Officer, Serchhip chuan naupangte hi chaklo tak leh mahni pawh invenghim thei lo an nih avangin puitling te venhimna an mamawh a ni a ti a. Naupangte himna atan dan chi hrang hrang siam niin, chung dante chu a hlawhtlin zel theihna atan theihtawpa hmalak mek zel a nih thu a sawi a ni. Kan fate an him em tih hi nu leh paten kan ngaih pawimawh hmasak ber tur niin, nu leh pa neilo naupangte pawh kan thlahthlam mai thiang lo a, an himna atan theihtawp chhuah turin kalkhawm nu leh pate a sawm a ni. Zir chianna atanga alan danin naupang chunga hleilenna thleng thin hi anmahni hnaih tak tute an nih fo avangin nu leh paten kan fate kan kalsan dawnah fimkhur a tul hle a ni a ti a, naupang chungah hleilenna thil engpawh thleng palh se, thuneitu hnenah hrilh hre ngei turin nu leh pate a chah a, naupangte dikna chanvo zah sak turin leh nu leh pate rinna leh sakhaw vawn avanga naupangin an lo tawrh ve dan kalh a ni a ti bawk.

He hun hi Pi C. Denghmingthangi, Chairperson, Village Health Sanitation & Nutrition Committee, Serchhip Village Council-I in a kaihruai a, Nutrition Day hman anih chhante sawiin Pi R. Vanlalhruaii, Secretary chuan report a pe thung. Village Health Sanitation & Nutrition Committee hi Zoram Entu Pawl hnuaia din niin Village Council tinah din a ni a, Nutrition Day pawh hi thla tin hman thin tura ruahman a ni.