Vawiin hian Serchhip District Traffic Management Committee chu an Chairman Pi Sangchhin Chinzah, Serchhip Bawrhsap ni bawk hovin a Office Chamber ah an thukhawm a. Kumin September thla lai hawl vel atanga Serchhip khaw chhung hmun thlan bik 5 (panga) a State Transport Authority ruahmanna anga Parking Fee khawn tan an rel.

Chairman Pi Sangchhin Chinzah chuan,  kan khaw chhung a lo thawl a, mipuite tana chenna nuam zawk leh him zawk a nih theih nan a chhunga lirthei che vel te mumal taka khuahkhirh a tul a, kan hmun lun laite mumal zawka enkawl a nih theih nan Parking Fee hi khawn a nih tur thu a sawi a. Lirthei neitute chu lirthei an lei dawna a dahna tur Garrage nei vek anga insawia intiamkam an nih angin kawng kama lirthei zanriah thin te pawhin dan an zawm a tul tur thu a sawi bawk. Dan zawm lo lirthei neitute chu an chungah dan anga hmalak zel a nih tur thu leh, mipuiten dan zawm chunga lirthei enkawl theuh tum turin a chah a ni.

Serchhip khaw chhunga Parking Fee lakna hmun tura State Transport Authority in a puan leh rate a rawn bithliah chu hetiang hi a ni:

1. Area 1          -         DEO Office (AOC) atanga PWD (Town Hall) peng inkar Chhim lam side zawng. He  Area-ah hian darkar khat leh a hnuai lam (up to one hour) ah zel Two Wheeler tan Rs. 5, LMV, Maxi Cab leh Town Bus tan Rs. 10 theuh a ni ang.
2. Area 2          -         PWD Peng atanga Police Beat Post (Town Bus Stand) inkar, Chhim lam side zawng. Hetah hian darkar khat leh a hnuai lam (up to one hour) ah zel Two Wheeler leh Three Wheeler tan Rs. 5, LMV tan Rs. 10.
3. Area 3          -         Beat Post (Traffic Point) atanga Tripper Stand inkar zawng. Hetah hian darkar khat leh a hnuai lam (up to one hour) ah Two wheeler leh Three wheeler tan Rs. 5, LMV, Maxi Cab, LGV, leh MGV/HGV tan Rs. 10.
4. Area 4           -        IOC atanga PWD IB Peng inkar. Hetah hian darkar khat leh a hnuai lam (up to one hour) ah Three Wheeler tan Rs. 5
5. Area 5          -         New Serchhip College peng. Hetah hian darkar khat leh a hnuai lam (up to one hour) ah Three Wheeler tan Rs. 5

Heng rate te hi darkar bia chhiar chhoh sak zel tur a ni ang.

Three Wheeler leh LMV Public Service, sawrkar in stand a pekte chu an Stand ah nikhat atan Three Wheeler in Rs.5 Leh LMV in Rs. 10 an pe thin anga. Hei hi anmahni Stand-a an dinna atan chuah niin Parking Area danga an dinnaah erawh chuan Parking Fee pangai, a chunga kan sawi ang khian an chawi ve zel ang.

Lirthei pakhat hi  nikhatah a dahna hmun pangaiah darkar 10 chin bak dah phal a nilova, chutiang aia rei dah ngai, thil tul bik a awm chuan thuneitute phalna neih a ngai thin dawn a ni.

Heng Parking Area atana puanna hmuna Collector dil duhte tan dilna hun hawn nghal a ni dawn a, Chanchinbua Tender Notice a chhuah atanga hun tiam chhungin a dil duh apiang tan dil theih a ni ang.