Nimin nileng khan Serchhip DC Conference Hall-ah UD&PA Department bultumin Rajiv Awaaz Yojana chungchang zirhona hun hman a ni a, Serchhip khawpui huamchhunga Village Council hrang hrang aiawhte, YMA, MHIP leh BPL aiawhte an tel a ni.

Nimina RAY chungchang zirchianna hun hawngtu Serchhip District bawrhsap Pi Juhi Mukherjee, IAS chuan khawpuia cheng mirethei leh chanhai ten an nitin mamawh chi hrang hrang te awlsam zawka an neih ve theihna tura Sawrkarin ruahmanna a duang chhuak chu lawmawm a tih thu a sawi a, Serchhip khawpui pawh a thang zel a, mihring an pun belh zel avangin chenna in nei mumal lo an pun belh zel thei a, heng lo sutkian na tur hian RAY hi ruahman anih thu sawiin kalkhawmte chu uluk taka zirchiang a an khawtlang tana hmasialtu an nih hria a tangkai taka hman tum turin a chah a ni.

RAY Scheme hian India ram chu “Slum-Free India” a siam a tum a, mission mode a kalpui tur niin he Scheme hnuaiah hian BPL ten Property Rights an neih ve theih nan hma lak ani dawn a ni. Khawpuia inhmun neihloh vanga chenna in neilote an pun zel lohna tura he Scheme hi ruahman a ni a, Slum pockets chhunga inluah tur te tan civic infrastructure leh social amenities tihchangtlun sak te, slum pockets lo pian chhuah chhan zirchiana siamthat ngai lai siamthat te, khawpuia mirethei ten sum an puk theihna tura hmalak te, hnathawktute kawng chi hrang hranga Training tha tak pek te he Scheme hian a tum dawn a ni.

RAY zirchianna hun hi Pu ST Lalhmingmawia, DUDO/DPO (SJSRY), Serchhip in a kaihruai a, chawhma lamah RAY kalphung leh nuhphung te in zirtir a ni a, chawhnu lamah sawihona hun leh zawhna leh chhanna hun hman a ni.