Ram chhung hmun dangte rualin vawiin chawhma dar 10:00 khan Serchhip Field-II ah India Republic Day vawi 63-na ropui taka lawm a ni a, Serchhip District Bawrhsap Pu P.Lalchhuanga’n Hnam Puanzar pawt pharhin, chibai a buk a. Republic Day Ceremonial Parade Contingent 13 te a endik hnu ah parade Contingent ten hnam puanzar chibai an buk chu Bawrhsap chuan chhang letin mipui te hnenah thuchah a sawi a, district mipui zawng zawngte hnenah duhsakna hlanin, mipui tana ram venhim hna thawktu sipai te hnenah a bik takin chibai bukna a hlan bawk.

District Bawrhsap Pu P.Lalchhuanga chuan, India ram zalenna atana tha leh zung, an theihna zawng zawng senga an nunna hial hlan tute bakah India ram mahni a ro inrel hrang tura dan leh hrai tha tak duang chhuak tute hi chawimawina sang leh zahna hlu kan hlan a kan hriatreng a pawimawh thu sawiin, an inpekna ropui tak avanga India ram hi khawvela democracy ram lian ber leh hlawhtling ber ti a hriat hlawh phah ani a ti bawk. Democracy innghahna lungphum pawimawh ber chu mipuiten kan aiawh a roreltu tur kan thlan hi a ni tih sawiin February thla a Village Council Election lo awm turah pawh mipui ten an dikna chanvo hria a phur taka tel theuh turin a sawm nghal a ni.

Serchhip District chhunga sawrkar hmalakna hrang hrang zingah Serchhip khawpui infrastructure development hna engemaw zat thawh mek te, Sports Complex, India hmarchhak a Auditorium changkang ber pawl ni thei tura ngaih sak mek te, Indoor Stadium engemaw zat sak mek anih thu te leh Boxing Hall tha tak sak mek anih thu te tarlangin heng bakah hman leh khawtlang rohlu awm tawh sa te hi thang leh thar lo awm zel turte tana kawng hrang hranga pawimawh tak tak an nih avangin uluk leh duat taka enkawl a tul a tih thu a sawi a, neitu rilru pu chunga sawrkar bungrua te enkawl pui turin a sawm bawk. Media te chu an mawhphurhna san zia hre reng chunga mipui rilru kaihruai tha tur leh ram, leh hnam hmasawnna hawi thuchhuah uar tura chahin thawhona tha tak an neih chhunzawm zel a beisei thu a sawi bawk ani.

Bawrhsap chuan Sawrkar Flagship programme NLUP pawh nikum January ni 14 a bul tan anih atang khan Serchhip District ah a thawhkhatna atan chhungkaw 3074 hnenah tanpuina semchhuah anih tawh thu a sawi a, a thawh hnihna atanchhungkaw 3054 hnenah tanpuina semchhuah tur peihfel thawkhat anih tawh thu sawiin, a thawh thumna leh thawhlina atan chhungkaw dang 3663 tanpuina tur pawh ruahmanna siam mek anih thu a sawi a, thing leh mau, nungcha te humhalh that a tul thu uar taka sawiin kangmei laka in ven fimkhur a tul thu te, khawpui vawnfai lama tan lak nasat a tul thu te a sawi bawk.

Kumin Republic day lawmna inkhawm ah hian kum dang anglo takin mipuite mit leh beng ti tlai tur item hrang hrang bakah hnam inpumkhatna lam hawi cultural item te neih a ni a, Serchhip YMA Sub-Headquarters Cultural Troupe ten hnam lam hmuhnawm tak an entir a, 14 Assam Rifles ten Punjabi lam hmingthang Bhangra Dance an entir chuan mipui te lawm a hlawh hle bawk a, Dog Show hmuhnawm tak entir ni bawkin SSA Serchhip District Pipe Band ten Band Display hmuhnawm tak an entir bawk.

Parade Contingent 13 awmte zingah hian School Contingent 9 awmin a titha hengte hnenah hian Khuallian District Bawrhsap-in lawmman a sem nghal bawk : Pakhatna – J.M. High School, Pahnihna – Lal Thanhawla Higher secondary School, Pathumna- C.V. Residential High School. Midang zawng hnenah Participation Prize hlan an ni a, abik takin Ex-Servicemen te Parade Contingent a an tel chuan ngaihhlut an hlawh hle a ni.

Republic day lawmna inkhawm neih zawh hian DC Bungalow ah chhun dar 12:30 atangin sawmbikte tan “DC’s At Home” buatsaih a ni a, chawhnu ah Field No. II ah Republic Day DC Volleyball Running Trophy Final Match khelh a ni a, hetah hian Lalmama Volleyball Club, Chhiahtlang chuan Vengchung Volleyball Club hnehin lawmman nomawi leh tangkafai Rs. 7,000 Bawrhsap hnen atang hian an dawng a ni.

Attachment

  • Loading attachment...