Vawiin chawhma dar 11 khan Mizoram Information Commission leh I&PR Dept. tangkawpin Serchhip DC Conference Hall ‘RTI Week 2013’ puala inkhawm a buatsaih a, he hun hi Serchhip bawrhsap Pi Juhi Mukherjee, IAS chuan khuallian niin a hmanpui a, Serchhip town area a Sawrkar pisa hrang hrang SPIO, SAPIO leh DAA bakah tlawmngai pawl hrang hrang aiawh te, PRISM leh MZP aiawh te bakah zirlai sawm bik te leh thuthar lakhawmtute an kalkhawm a ni.

Vawiin a RTI Week 2013 puala inkhawmah hian khuallian Pi Juhi Mukherjee chuan mipuite ta tur Right to Information Act neih anih theih nan a beitu ten harsatna lian tak hnuaiah  mahni inhlan in an sual chhuak a ni a ti a, Sawrkar langtlang leh rintlak neih anih theihna tura hmanrua pawimawh tak a nih avangin mipuite hian he dan hi kan hriatchian a kan bel a ngai a ni a ti bawk. RTI activist  te leh official te pawh inhmelma en mai lova ram leh hnam hmasawnna atana thawktu pawimawh tak kan ni ve ve tih hria a dan hnuaia dik taka mahni tih tur ang theuh te huaisen taka kan tih ngam a ngai a ni a ti a, Official te pawh RTI Act in a phut angin RTI Act hmanga dil chhuah kher ngai lova an hmalakna leh hmasawn dan te mipui hriat theih tura puanzar hreh lo turin a chah bawk a ni.

Vawiin inkhawmah hian District Information & Public Relations Office, Serchhip-in “RTI Week – 2013” puala Serchhip khawchhunga High School leh Higher secondary School zirlai te tan a intihsiak  Slogan (au hla) Writing Competition a buatsaih a titha thlanchhuahte hnenah Khuallian hian lawmman hlan nghal a, intihsiakna ah hian Slogan chi hrang hrang 75 lutin heng ahnuai ami te hi a titha zual thlan chhuah te chu an ni :

1st – Lallawmkima s/o Lalbiakliana (L), Class-XII, Lal Thanhawla Higher Secondary School .  “Mipuiten RTI Act hi eirukna umbona tur leh langtlang Sawrkar siamna hmanrua ah i hmang ang u”. Lawmman - Citation + Rs. 1000/-.

2nd – LawrenceZirlianthanga s/o Lalsangzuala, Class-X, MarianHigh School, Serchhip.  “RTI– Hre tura mitinte Dikna Chanvo petu”.  Lawmman – Citation + Rs. 700 /- .                                                          

3rd  - C. Lalrinfeli d/o P.C. Vanlalkima, Govt. JM High School, Serchhip,  “ RTI hi dan rangkachak, kandikna chanvo kanhumhalh theih nana huaisenna min petu a ni”.  Lawmman – Citation + Rs. 500 /- .   

Zirlai pali hnenah Consolation Prize Citation + Rs. 200 /-   theuh hlan a ni bawk.

Vawiin inkhawm hi Pu Lalsangliana, MCS, Addl.DC Serchhip in a kaihruai a, “RTI- An Anti-Corruption Tool” tih hmanga Pu Andrew H. Lalremruata, MIS, DIPRO Serchhip paper buatsaih chu zirho a ni a, Pu Vanlalrova, MCS, BDO Serchhip in lawmthu sawina hun hmangin he inkhawm hi a khar a ni.