Serchhip District Bawrhsap leh District Election Officer ni bawk Pi Juhi Mukherjee, IAS hovin vawiin chawhma dar 11 khan ama pisa ah District Level Systematic Voters Education and Electoral Participation Committee (SVEEP) chu an thukhawm.

District Election Officer chuan kan hma inthlanpui lo awm turah vote a tlak that theih nan engtia hmalak tur nge ni ang tih ngaihtuah ho tur anih thu a sawi a, Sawihona hun hawng nghalin; ngaihdan leh duhdan hrang hrang sawiho anih hnu ah hmalak dan tur kawng chi hrang hrang hetiang hian an ruahman a ni :

1)    Model Code of Conduct-in political party te chu voters te lirthei hmanga vote thlak tura hruai a khap avangin MPF te hma la tura ngen tum a ni a; Serchhip District Mizoram People Forum (MPF) chu tar leh upa chak lote tan a tul anga vote an thlak theih dan tur ngaihtuahsak tura beisei an ni.

2)    Inthlan hnuhnung bera vote tla atanga chhuta vote tla punna sang ber Polling Station leh kumin Inthlana vote tlak that berna Polling Station hnenah lawmman siam a ni ang.

3)    Polling Station tina vote thlak upa ber leh naupang ber hnenah Certificate/Citation hlan a ni ang.

4)    Vote thlak tura kal zinga upa zual te, dam thalo, raipuar hram tawh leh nausen pawm te tan rei tak intlar/nghak lova vote thlak tir tura hriattir tur leh lo buaipui turin Polling Party tin te beisei an ni.

5)    Govt. Serchhip College-ah Facilitation Centre/Help Desk siam a ni ang a. College zirlaite zingah January ni1,2013-a kum 18 tling tawh, India khua leh tui dik tak, Electoral Roll-a la chuang lo te chu College zirtirtu te nen zawng chhuakin Form-6 pek a; Bialtu BLO kaltlangin ERO/AERO hnenah hlan leh tur a ni ang. Hetiang Facilitation Centre hi Serchhip Bazar-ah pawh Inrinni dar 6:00 AM - 4:00 PM thleng hawn a ni bawk ang a. Bialtu BLO leh DO ten heng Facilitation Centre te hi an buaipui ang.

6)    Higher Secondary School Principal zawng zawng te chu an zirlaite zingah January ni1,2013-a kum 18 tling chin, India khua leh tui dik tak Electoral Roll-a la chuang lo an awm chuan zawng chhuak a, Form-6 hmanga bialtu BLO kaltlanga Electoral Roll a luh dil turin hma la tura ngen an ni.

7)    Serchhip khawpui chhunga YMA Branch hrang hrang te tan SVEEP Rally Dt. 21st - 25th Nov., 2013 chhungin buatsaih tum a ni a, Rally a tel te tan refreshment, lukhum/T-Shirt siam a ni ang a; programme kimchang chu Sub-Hqrs. YMA hruaitute nen la sawiho leh tur a ni.

8)    Sub-Hqrs. YMA, Serchhip-in Sub-Hqrs. huapin YMA intawhkhawm an buatsaih ang a. Chumi atan chuan Rs. 15,000/- pek an ni ang. Hemi hunah hian SVEEP Campaign neih a ni ang. Hemi huna Sound System leh Video Coverage chu DC Office-in an ngaihtuah ang.

9)    Sub-Hqrs. YMA, MHIP leh MUP te chu an huamchhung Branch tin te hnenah inthlanpui huna vote tla a that theihna tura hma la tura ngenna lo siam tura tih an ni a. Stationery item an mamawh ang ang te chu Election Branch atanga ngaihtuahsak an ni ang.

10)   Dt. 25.10.2013 - 4.11.2013 chhung Serchhip District chhungah ASHA Worker 56, Anganwadi Worker 154 leh Gram Sevak 20 ten SVEEP Campaign an nei dawn a. Hei hi lo tawiawm theuh turin mitinte ngen an ni.