UD&PA Department buatsaihin vawiin khan Serchhip DC Conference Hall-ah tangkai zawka bawlhhlawh sawngbawl dan “One Day Workshop on Solid Waste Management (SWM)” zirho a ni a, Serchhip khawpui huamchhunga khawtlang hruaitu leh tlawmngai pawl hrang hrang hruaitute an tel a, he hun hi UD&PA Director Pu Zorammuana, MCS-in kaihruaiin; District Bawrhsap Pi Juhi Mukherjee, IAS chuan khuallian niin a hawng a ni.

Bawrhsap chuan bawlhhlawh/hnawmhnawk kan tih te hi mipui kan pun zel avang leh hmasawnna hrang hrang avanga khawpui thang zelah hian a pung ve zel a, keimahni chunga harsatna min thlen let lo tur zawnga kan sawngbawl thiam hi a pawimawh hle a ni a ti a, tlangrama cheng kan nih bakah ramngaw leh sik leh sa nuam tak kan nei a, heng tichhe lo zawng tura bawlhhlawh sawngbawl kan thiam hi tun atangin a pawimawh tawh a ni tiin khawtlang hruaitu leh tlawmngai pawl hruaitu kalkhawmte chu an mawhphurhna a ngai a hmahruai tura inbuatsaih turin a ngen a ni.

UD&PA Director Pu Zorammuana, MCS pawhin fuihna thu sawiin bawllhawh/hnawmhnawk kan tih te hi chi hrang hranga thliarin a tam zawk hi chu la hman tangkai theih an ni a, a sawngbawl hautak silova hlawk taka kan hman tangkai theih dan inzirtir hi a pawimawh a ni a ti a, bawlhhlawh hi sumchang thlaiah a chhuah theih ani tih kan hriat a pawimawh ani a ti bawk.

Vawiin workshop-ah hian Solid Waste Management pawimawhna leh a thatna te, khawpui bawlhhlawh hlawm khata lakhawm vek lova hmun hrang hranga sawngbawl a thatna leh a tihdan tur te, changpat hmanga bawlhhlawh/hnawmhnawkte leitha a chantir dan (Vermicomposting) te zirho a ni a, UD&PA Department-a mithiamte leh “Vermizo” hotuten zirtirna hi an pe a ni.

Vawiin zirhona ah hian Serchhip khawpui huamchhunga Village Council hrang hrang aiawhte, Sub-Headquarters YMA, MHIP leh MUP bakah Branch YMA leh MHIP te, Unit MUP aiawhte an tel kim hle a, College aiawhte, Thenzawla Police Training School hotute bakah Jawahar Navodaya Vidyalaya (JNV) hotute, thuthar thehdarhtute an tel tha hle a ni.