Vawiin chawhma dar 10 khan Aizawl Diocese-a Ursuline Franciscan Congregation te chuan Serchhip-ah an congregation din cham vawi 125na (Post Centenary Silver Jubilee) an lawm a, Most Rev. Bishop Stephen Rotluanga CSC Aizawl Bishop leh Pu P. Lalchhuanga District Bawrhsap ten khuallian leh khual zahawm niin an hmanpui.
He Jubilee lawmna pui ber chu an congregation hmun pui ber Mangalore-ah April 12, 2012 khan neih a lo ni tawh a, Aizawl Diocese pual tan vawiin hian he jubilee lawmna hi buatsaih a ni. He Jubilee lawmna hi chhawng hniha neih a ni a, a chhawng khatna chu Our Lady of Assumption Church, Serchhipah ah Bishop hova Lawmthu sawina Mass hlan a ni a, chumi hnuah Little Flower Convent School Hall-ah a lawman hun hman ho leh nghal a ni. He hun hmang tur hian Bishop mai bakah Aizawl Diocese Vicar General Rev. Fr. Arullapan te, Ursuline Franciscan Congregation, North East Province-a an Mother Superior, Sister Milly Fernandes te leh Puithiam leh Sister thahnem tak an lo kal a ni.
Ursuline Franciscan Congregation te hi Catholic Kohhranin Mizorama hmeichhe pawl rawngbawltu an neih pawl hrang hrang 12 zinga pahnihna niin kum 1976 atang khan rawngbawl hna an rawn thawk tan a, tunah hian Mizoram hmun hrang hrang pariatah rawng bawl mekin an rawngbawlna pui ber chu zirna in enkawl a ni a, chumi piah lamah rinna lama kohhran mipuite kaihhruai te, thingtlang mipuite ei leh bar zawnna kawnga tihhmasawn te, tihdamna lam te leh vantlang rawngbawlna chi hrang hrang an kalpui mek a ni. Mizorama an rawngbawlna hmun langsar deuh te chu, Little Flower Convent School Serchhip te, St. Peters School (Elementary Section) Chhingchhip te, Sacred Heart School Lunglei bakah St. Mary’s School Aizawl Electric veng te hi an ni.
Ursuline Franciscan Congregation hi kum 1887 April thla khan German Puithiam Urban Steina’n Mangalore-a Rosario Cathedral-ah a din a ni a. Tunah hian India ram state hrang hrang 12 bakah Europe ram leh Africa ram lam te thlengin an inzar pharh tawh a. Tun dinhmunah rawngbawltu sister puitling 821 leh sister ni tura zir lai mek engemaw zat an awm mek a ni.
