Vawiin hian Serchhip khaw chhunga Porcine Reproductive and Respiratory Syndrome (PRRS) leh Classical Swin Fever (CSF) nia rinhlelh vanga Vawk thi leh damlote Central leh State mithiamten an endik.

Dr. HR Khanna, Asst. Commissioner, Government of India leh Dr. Raju Kumar, Principal Scientist, National Institute of High Security Animal Diseases (NIHSAD), Bhopal te bakah Mizoram AH & Vety Department a Disease Investigation Wing mithiam Dr. Robert Rualthankhuma, Dr. Esther Lalzoliani leh Dr. Neihthangpuii te chuan Serchhip khaw chhunga Vawk hrileng PRRS leh CSF vanga vawk damlo mek leh a thi tawhte pawh endikin, an thisen te pawh Laboratory lama la enzui turin an la hlawm a. A theih angin Mizorama heng ran natna hrite a len thin chhan leh a venna turte an zirchiang dawn a ni.

AH & Vety, Serchhip a thawkte hian tun hnai hian Serchhip District a vawk damlo thisen sample 53 lai an lo la tawhin Laboratory ah an lo test tir tawh a. Sample 53 a 31 hi PRRS natna hri kai an nih bakah a dang 11 te chu CSF hrik kai an nih thu finfiah tawh niin tunhnaia vawk hrileng vang hian Serchhip District ah vawk note 142 leh a puitling 101, a vaiin vawk 243 an thih tawh thu Team te hi an lo hrilh a ni. Tin, kum 2016 khan PRRS leh CSF te hi Serchhip District ah an lo leng chiam tawh a, vawk 510 zetin an lo thih phah tawh a ni.

Vawiina Central mithiam leh State Team te hi Serchhip a AH & Vety Department hotute leh thawktuten an lo dawngsawng a ni.