Serchhip District a Training Centre atana ruat khaw hrang hrang 5 (panga) ah February ni 23, 2012 a Serchhip District a Village Council inthlanna neih tura Polling Official te tan vawiin khan training buatsaih a ni a, Serchhip ah pawh D.C Conference Hall-ah training neih niin District Bawrhsap, District Election Officer ni bawk Pu P.Lalchhuanga’n a telpui a ni.

Bawrhsap chuan polling official te chu training la urhsun tura chahin inthlan buaipui chu thil hautak, thiam bel tak tak theih loh , hmasawnna thangchho zel avanga kalphung thlak ngai ve zel anih avangin tihsual awmlo tura fimkhur a tul em em a ni a ti a, Dan in an hnathawh tur a ruat sak dik tak leh rinawm taka an zawm chuan buaina an pumpelh mai dawn ani tih hria a dik taka thawk turin a hrilh bawk.

Inthlanna a vote hralh ching an awm thin chu pawi a tih thu sawiin Bawrhsap chuan polling official te chu voters ten vote an thlak laiin ballot paper dik tak kha ballot box ah an thlak ngei a, ballot paper an chhuahpui lo ani tih hriatchian tum turin a chah a, Election Observer te hnenah leh District Election Officer hnena report hrilh hun tur ruat ah hrilh chat chat thei tura inbuatsaih turin leh Election Observer te leh District Election Officer ten an hriat duh ang an zawh hun pawha fel fai taka lo chhang chat chat thei tura inbuatsaih tura chahin, an duhthlan vang leh an chak vanga election duty tura koh an ni lova, ram leh hnam hmasawnna leh dinchhuahna atan a pawimawh em avanga heng hna thawk tura thlan an ni tih in hre reng a, ram leh hnam hmangaihna rilru dik nen thahnemngai taka an hna chanpual te hlen vek turin duhsakna a hlan nghal bawk a ni.

Polling Official te tana training hi Serchhip bakah, Lungpho, North Vanlaiphai, East Lungdar leh Chhingchhip ah te a rualin neih a ni a, Serchhip DLAO Staff ten insemdarhin training an pe a, Serchhip District chhunga khaw hrang hrang a Polling Official tura ruat te chu Training na atana thlan chhuah khua te zinga an hnaih ber theuh ah an kal khawm a ni.

Serchhip-a Polling Official te Training hawnna inkhawm hi Pu S.T. Lalhmingmawia DLAO, Assistant District Election Officer ni bawkin kaihruaiin amah vekin Training hi a pe nghal a, Serchhip bikah chuan Serchhip leh a chheh vel khua atangin Returning Officer 16, Presiding Officer 27 leh 1st Polling Officer 27, an vaiin mi 70 an tel thei a ni.

Tun tum VC inthlan kalphung hi hun hmasa lam aia a danglam avangin mipuiten harsatna tawk lova vote felfai taka an thlak theih nan anmahni tanpui turin Serchhip DLAO hian vote thlak dan inzirtirna Short Documentary Film a buatsaih a, hei hi vawiin a polling official training te nen thlirhovin, mipuite chhawr tangkai theih turin Cable TV a chhuah chhawn tura ruahman a ni bawk.