Vawiin MLA Election 2018 Vote thlak kal zelah Serchhip District Assembly Constituency pathum; 26th Serchhip, 27thTuikum leh 28th Hrangturzo ah te boruak muanawm taka vote thlak a ni a. He Report butasaih lai thleng hian vote hi 81% vel a tla tawh a. Polling Area chhunga awm vote la thlak lo engemawzat an la awm avangin vote tla zat hi a la danglam leh dawn a ni. 

Tlai lam dar 4:00 pm vote thlak tawp huna Serchhip District dinhmun tlangpui chu hetiang hi a ni: 26- Serchhip ah voters 18012 atangin vote 14096 a tla a, chu chu 78% a ni. Vote thlak tura Polling Area chhunga intlar mi 586 an la awm a. An ni hian vote an thlak leh vek chuan 3% in vote tla zat hi a la pung leh ang. 27- Tuikum ah voters 15461 atangin vote 13095 a tla tawh a, chu chu za zela 85 niin vote thlak tura intlar mi 364 an la awm a. An ni hian an thlak leh vek chuan 2% in vote tla zat hi a la pung leh ang. Tin, 28-Hrangturzo ah voters 15507 atangin vote 12366 a tla tawh a, chu chu 80% a ni. Vote thlak tura intlar mi 293 an la awm bawk a. An ni hian vote an thlak vek chuan vote thla zat hi 2% in a la pung leh bawk ang. Tichuan, tlai dar 4:00 pm chiah a Serchhip District dinhmun chu; vote awm zawng zawng 48980 atangin vote 39557 a tla a, chu chu 81% niin vote thlak tura intlar mipui 1243 an la awm mek a. An ni hian vote an thlak vek chuan 3% in a pung chho anga; tichuan vote tla zawng zawng chu za zela 84% a ni chho dawn tihna a ni. Hetihlai hian Service voters leh Postal Ballot ten an la belh leh dawn a, vote tla zat hi a la danglam leh thei dawn a ni.

District Election Office ruahmanna  angin  vawiin inthlan ni  hian Mizoram People Forum (MPF) Serchhip District leh Khua / Veng tina  MPF Local Forum ten Polling Station tinah duty in, pianphunga rualbanlo  te (PwD) Vote thlak turin an hruai hlawm a. Hmun hrang hrangah dan bawhchhiatna awm thei vengin an duty bawk. Tin, Serchhipah hian Hmeichhe hlang Duty na Pink Polling Station (Dingdi Polling Station) chu 26/17 Little Flower Convent ah buatsaih a ni bawk. 

Serchhip District chhunga Assembly Constituency pathumah hian Polling Station 77 awmin, 26- Serchhip ah Polling Station 23,  27- Tuikumah Polling Station 29,  leh 28-Hrangturzo-ah Polling Station 25 te an awm a. District chhunga candidate awm zawng zawng hi mi 19 niin, Serchhip ah 7, Tuikum  leh Hrangturzo ah mi 6 ve ve an ni.

Polling Party te hian zanin hian District Election Office hi an rawn pankhawm nghal a, zan dar 12 velah an thlen kim theih beisei a ni.