Vawiin chawhnu dar 1:00 khan Serchhip District Bawrhsap Dr. Franklin Laltinkhuma, IAS chu Aizawl District Bawrhsap ni tur a kal dawn avangin DC Office Staff ten a pualin thlahna hun an hmang.

Thlahna inkhawm DC Meeting Room-a neih hi Pu Lawmkima, MCS SDO (Sadar- in a kaihruaia, DC kalchhuak tur Pu Franklin Laltinkhuma chuan thu sawiin, hun reilo an thawhho chhunga harsatna tawk lo leh tha taka an tawiawmna leh thawhpuinaah DC Office staff te lawmthu a hrilh a, MP Elelction leh Hrangturzo Bial By-Election inthlanna tluang tak leh felfai taka an kalpui thei chu DC Office staff te zinga a te ber atanga lian ber thlenga lungrual taka an thawh hona vang liau liau a ni tih thu a sawi a, DC Office staff te chu rinawm taka an hna thawh a pawimawh zia hrilhin, eng hna pawh thawk ila, a lian emaw ate emaw pawh nise, kan hna chanpual theuh rinawm taka kan thawh chuan kan hnathawh chu hna zahawm a ni mai dawn a ni ti bawk.

Pu VL Remliana,MCS, Addl. DC pawhin bawrhsap thlahna thu sawiin, a kal lehzelna turah duhsakna DC Office aiawhin a hlan a, Pi R. Lalmuankimi, Superintendent chuan thlahna thilpek a hlan a ni.

Pu Franklin Laltinkhuma hian vawiin tlai hian Serchhip chhuahsanin Aizawl a pan nghal a, Serchhip District Bawrhsap ni turin Pi Juhi Mukherjee, IAS Aizawl bawrhsap chuan ni 24 May, 2014(Inrinni) hian Serchhip a thleng ang.

Tarlan tawh angin Serchhip District Bawrhsap leh Aizawl District Bawrhsap hi ECI-in MP Election leh Hrangturzo bial By-Election atan an awmhmun inthlak thleng turin thupek a chhuah a, he thu pek ang hian MP Election zawh veleh, an chanvo ngaiah an let leh a ni.