No.2811/2020-2020

Dated Serchhip, the 7th July, 2020: Vawiin hian Serchhip Bawrhsap thar Pu Kumar Abhishek, IAS chuan a pisaah Mizoram Journalist Association, Serchhip te lengah sawmin inkawmna a buatsaih a. Hmalakna tinrenga inpawh taka thawhpuiah a sawm.

Pu Kumar Abhishek chuan, kum 2018 October thla atanga Mizorama a awm tawh thu sawiin ram ralmuang, mipui inpawhtlang leh boruak nuam tak nia a hriat thu a sawi a. Serchhip district chu ram lailia awm, ziak leh chhiar thiam tamna district, faina kawnga hmala tha a nih avanga a ngainat nghal thu a sawi a. Hun remchang a awm phawt chuan a theih anga tam district chhunga khuate tlawh a duh thu leh Mamit District a a awm laia a lo tih tawh, 'in khuaah sawrkar' programme pawh a theih chuan Serchhipah kalpui ve leh ngei a rilruk thute a sawi bawk. He ruahmanna a lo kalpui tawh dan chuan sawrkar official ten a ruala thingtlang khuate tlawhin mipuite mamawh an tihsak theih ang chi apiang an va tihsak thin a ni.

He hunah hian Serchhip MJA President chuan, bawrhsap thar chu chanchinbumite an lo lawm thu hrilhin kawng engkimah thawhpui an inhuam thu a hrilh a. A tul a nih phawt chuan chanchinbumite chu thurawn pea, kaihhruai an ngaihna tinah engkim hrilh hreh lo turin a ngen a ni. MJA member dangte pawhin Pu Kumar Abhishek a hnenah hian an ngaih pawimawh zawng leh tha nia an hriatte an sawi ve bawk.

Bawrhsap thar hi Pu K. Saitluanga, MIS, DIPRO, Serchhipin a tawiawm a, Serchhip a Media dinhmun tlangpui sawiin Serchhip khaw chhungah Daily Newspapers pasarih, Cable TVs pathum, MJA members 10 an awm a, MJA members hi Thenzawlah 2 leh N. Vanlaiphaiah 1, te nen an vaiin district ah 13 an awm thu a tarlang.