1579/2024-2025

Dated Serchhip, the 14^th August, 2024: India Independence Day 2024 lawmna chu August ni 15 (Ningani) chawhma dar 10:00 ah LAD Minister Pu C.Lalsawivunga hoin Serchhip Sports Complex ah ropui taka lawm a ni dawn a, he hunah hian Serchhip District mipui zawng zawng te tel theuh turin Serchhip DC Pu Paul L.Khuma chuan a sawm a ni.

India ram chuan kum 1947, August ni 15 khan Kumpinu Sorkar lak atanga zalenna hmuin, independent, mahni a inrelbawl sorkar a lo ni ve ta a; hemi kum atang hian kum tin India Sorkar chuan Independence Day hi August ni 15 hian a lawm ziah thin a. Kuminah India ram Independence Day vawi 78-na a lo thleng leh dawn ta a, Serchhip Sports Complex-ah August ni 15, dar 10:00 AM ah Serchhip District chhunga a lawmna pui ber neih a ni dawn a ni. Serchhip DC chuan  “Independence kan hmuh theihna tura sulsute, nunna leh thisen chhuaka he zalenna hi kan hmaa mihuaisen ten an lo sual chhuah a ni tih hre thar leh chungin Independence Day vawi 78na kan District-in kan hman turah hian Serchhip District mipui zawng zawng te lo tel vek turin ka sawm a che u” tiin vawiin khan mipuite hnena hriattirna leh sawmna a tichhuak a ni.

Independence Day lawmna kal zelah Serchhip DC bultumin India flag nena kawng zawh - Tiranga Yatra chu August ni 13 zing karah neih niin zirlai naupang te leh mipui ten Serchhip Bazar atanga AOC kawn thleng kawng an zawh a. DC in hriattirna leh ngenna a lo tihchhuah tawh angin in tina hnam puanzar zar “Har Ghar Tiranga” chu mipui ten zawmin hmun hrang hrangah India flag zar a ni a. Parade Contingent ten Independence Day lawmna inpuahchhahna vawrtawp Final Rehearsal chu nimin August ni 13 zing karah an nei fel tawh bawk a ni.