595/2024-2025

Dated Serchhip, the 29th May, 2024: Cyclone Remal-in a thlen thlipui leh ruahpui avangin Mizoram chhung hmun hrang hrangah chhiatna nasa tak a thleng a. Serchhip District chhung khaw thenkhatah pawh thli leh ruahsur nasain chhiatna a thlen a awm nual a. He thilthleng chungchangah hian vawiin khan Serchhip Bawrhsap Pu David Lalthantluanga chuan District thuneitute ko khawmin DC Chamber-ah thutkhawm neih a ni.

DC Pu David Lalthantluanga chuan Serchhip District chhungah cyclone-in a tihchhiat chenna in, sumdawnna hmun, lo leh huan thenkhat te awmin, lei minin a hnawh kawngpui thenfai ngai hmun tam takah a awm a; chutihmek laiin chhiatna liantham, thihna leh hliam tuar te awm lova Serchhip District in Cyclone Remal a tuarchhuak thei chu lawmawm a tih thu meeting-ah hian a sawi a. Heng harsatna hrang hrang te hi thleng mahse essential services khawihtu department hrang hrang te, tlawmngai pawl te leh mipui mimir ten theihtawp chhuahin tan an la a, leimin leh thil dang te rang taka thenfai a ni, tih a sawi a. Tlawmngaia thawkchhuak mimal tin te hnenah lawmthu sawiin nunphung pangngai a kan let leh thuai theih nan Department hrang hrangte hmalakna thlawp tlat turin DC chuan Serchhip District mipuite a sawm a ni.

Serchhip District hi Zone 9 ah then darh niin Zonal Officer ten an vil a. Cyclone Remal-in a tihchhiat report te lakkhawm mek niin May ni 28 zan atangin report tum 48 dawn a ni tawh a. Serchhip District pumpuiah report dawn chinah in 14 a chhia a, heng zinga 7 hi luahtlak tawh loh fully damaged an ni. Sawrkar inkaihhruaina zulzuiin  Zonal Officer te hian tanpuina an pechhuak mek zel a ni.

Serchhip khawpui chhungah inkalpawhna kawng leimin a hnawh te thenfai mek a ni a. Khawlailung atanga Biate panna kawng leiminin a hnawhpin chu lirthei zawh theih tura thenfai a ni tawh a. Hmuntha atanga Khawbel panna kawng PCC Road bal chu a chhak laia motor kal theih tura siam tum a ni a. Hmuntha kawng block pawh thianfai tura ruahmanna siam mek a ni. Khumtung atanga Muallungthu panna hmun engemawzatah a ping a, Chhiahtlang atanga Lamchhip panna kawng erawh a kaltlang theih a ni. NHIDCL leh PWD te hian an chanpual kawng theuh te an thianfaiin an thawm tha mek a, ni hnih chhungin lirthei paltlang theih tura peihfel vek theih an inbeisei a ni.

Power supply chungchangah Serchhip District chawmtu Zuangtui-Bukpui 132KV line leh Lunglei via Melriat line a chhia a. Khawzawl via Saitual line, East Lungdar Sub Station atangin power lakluh mek a ni a. Zuangtui line pawh vawiin lamah siamthat hman beisei a ni. LT line chhia engmawzat a awm avangin siamthat hna thawh mek a ni a, zanin emaw naktuk hian Serchhip District khaw chhung hmun hrang hrangah power pekchhuah kim theih beisei a ni.

Serchhip mipui chawmtu tui semna transmission line leh IOC Booster Pump te chu cyclone-in a tichhia a. Mipui ten harsatna an tawh lohna turin PHE Department chuan siamthat hna an thawk mek a, kalphung pangngaia kal leh thei turin kar hnih vel an mamawh dawn tih meeting hian report a ni a. Hetih chhung hian mipuiin tui an nghei lo nan ruahmanna siam ni bawk mahse tui renchem a ngaih thu leh ruahtui khawl rain water harvesting uar a tul thu meeting-ah hian tarlan a ni.

Vawiin meeting ah hian PHE, PWD, P&E, NHIDCL hotute, zonal officer te leh District Administration kengkawhtu official te an tel a ni.