4247/2025-2026 

Dated Serchhip, the 1st February, 2026 : Vawiin khan Serchhip District Agriculture Marketing Committee (DAMC) member te chu an Chairman Pu Paul L Khuma, Serchhip DC hoin video conference hmangin meeting an nei.

Serchhip District ah hian Secondary Collection Centre (SCC) pariat a awm a. Naktuk February 2, 2026 atang hian SCC tinah sawhthing buk tan a nih tawh dawn avangin SCC tin te inpuahchah dan thlirho a ni. SCC tin te inbuatsaihna chungchang ngaihthlak niin sawhthing buk turin an inpeih fel tawh tih report a ni a. Sawhthing dahna tur kudam a hman theih em tih te leh sawhthing lilam tur hriattirna (auction notice) an tichhuak em tih te sawiho niin SCC tinin auction notice hi an chhuah theih tawh a ni. Sum chetvel dan mumal taka ziah luh tur a ni a. Accounts vawn fel dan turte inhrilhhriat nawn leh a ni bawk.

Supervisor ten PCC leh SCC hruaitute training pe tura beisei an nih angin an hmalak dan tur leh inkaihhruaina pawimawh zawng zawng training an pe fel vek tawh a. Mizoram Agriculture Marketing Board (MAMB) portal mizothlaithar.mizoram.gov.in/#/ ah hian inkaihhruaina bakah SCC leh PCC enkawl dan tur thul thar a hunbia dah chhuah thin a nih thu leh ngaihven fo a tul dan te inhrilhhriat a ni bawk.

PCC hrang hrang ten SCC ah sawhthing an dah tan tawh dawn avangin SCC te chu PCC te be rawn chunga an dah hun tur bituka ruahmanna siam turin an hriattir a. Heng an ruahmanna te hi DC office ah submit vek tura hriattir an ni bawk.

Supervisor ten sawhthing lut leh chhuak chungchang te, sawhthing kudama awm zat te, sawhthing hralh zat te kartin an thehlut thin dawn a. Hei bakah hian sawhthing dahna tur mesh bag chungchang te, service charge te, audit team-in SCC tin pawisa an endik thin tur chungchang te, N Vanlaiphai leh Lungpho kawng siam that chungchangte leh pawimawh dangte sawiho a ni.

Vawiin meeting ah hian SCC tina Supervisor, Coordinator, Audit Team te, SCC hruaitute leh DC office-a officer dang te an tel a ni.