1464/2024-2025

Dated Serchhip, the 6^th August, 2024: Vawiin khan Serchhip DC Pu Paul L.Khuma hovin Serchhip DC Meeting Hall-ah bawlhhlawh sawngbawlna hmun Solid Waste Management Centre sakna tur sawiho a ni.

Solid Waste Management Centre sakna tur hian Serchhip UD&PA Office chuan ruahmanna engemawchen a lo kalpui tawh a. Serchhip khaw daia Lungrual ramah Centre hi sak tum a nih laiin Serchhip khaw mipui tuitlan ber Tuikum a hnaih avangin hmun remchang dang zawn zawk ni se tih rawtna a lo chhuak a. Chhiahtlang khaw dai hmun remchang dap chhunzawm a ni a, hetihlai hian bawlhhlawh phurtute tan a panna kawng a thui deuh avangin Department chuan ngaihtuah nawn leh ni se tiin DC ah hian an thlen a ni.

Vawiin meeting ah hian UD&PA leh District Administration kengkawhtute bakah PHE leh Serchhip Thalai Pawl aiawh te an tel a. Tuikum tui lakna ti bawlhhlawh lo zawngin Serchhip Lungrual Ram leh Chhiahtlang daia Tualthah Mual chu a kawpa hman dan dap tha an ti a. Tuna Solid Waste Management Centre tur Lungrual Mualah hian hian bawlhhlawh tawih thei lo (dry waste) sawngbawl a ni dawn a. Hemi sawngbawl a nih hnua hmantlak loh hi landfill-ah dah tur a ni dawn a. Landfill erawh hi chu Chhiahtlang daia Tualthah Mualah siam ni zawk se, tiin meeting chuan a rel a ni.

DC Pu Paul L.Khuma chuan Serchhip District in chak zawka hma a sawn theihna turin khawtlang mipui te an pawimawhzia vawiin meeting-ah hian a sawi a. Sawrkar chu mipui rawngbawltu tura din a nih avangin mipuite thlawpna leh tawiawmna tel lovin hmasawnna hna a thawh theih loh, a ti a. Chuvangin, District tana hmasawnna ruhrel din tura ruahmanna awm mek te leh an hmachhawpte tluang taka a kal zel theih nan mipuiten Department te tawiawm tlat turin a sawm a ni.