1583/2026-2027

Dated Serchhip, the 30^th July 2026: Vawiin khan Serchhip District Deputy Commissioner Pu Paul L. Khuma hoin Solid Waste Management Rules, 2026 leh Plastic Waste Management Rules, 2016 Serchhip District-a kalpui dan leh hmalaknate thlirletna, DC Meeting Hall-ah neih a ni a, he hunah hian Special Cell for SWM member bakah bawlhhlawh sawngbawl lama hmalatu Green Herd SP te leh khawtlang hruaitute an tel a ni.

Meeting-ah hian Additional Deputy Commissioner Pi Dorothy Muansangi hnen atangin hmalak mek dan report ngaihthlak niin, SWM Rules, 2026 hlawhtling taka kalpui a nih theih nan, Village Council hruaitute’n uar lehzuala mipuite inzirtirna (awareness) an neih a tul thu te, dan zawm tha duh lote hnena hremna lek kawh a nih dan tur te, plastic thlakthlengna tur (alternative) awm theih dan turte leh ruahmanna hrang hrangte sawi ho a ni a. Serchhip district khawpui ‘urban’ leh thingtlang ‘rural village’ hrang hrangahte bawlhhlawh chi li-a thliar hranna (4-bin waste segregation system) kalpui dan turte sawi ho a ni bawk. 

Tun dinhmunah Serchhip district-ah DUDO hmalaknain urban area - New Serchhip North leh South VC area-ahte 4-bin waste segregation system hi kalpui tan mek niin, rural area – ah PHED hmalaknain heng khua - Sialsir, Sailulak, Leng leh Chhuanthar Tlangnuamah-te hian kalpui tan a ni dawn bawk a. Single-Use Plastic tih tlem a nih theih nana chak taka vil zuitu tur ‘Inspection Team’ pawh paruk (6) din a ni tawh bawk. Serchhip, Thenzawl leh N. Vanlaiphai-ahte bawlhhlawh sawngbawlna hmunpui – Solid Waste Management Centre (SWMC) leh Solid Waste Segregation Centre (SWSC) sak mek a ni bawk. 

Deputy Commissioner Pu Paul L. Khuma chuan khawtlang nuam, fai leh hrisel neihna tura hmalakna hi mipuite’n an thlawp that a pawimawh thu sawiin, mawhphurhna changtu department mi leh sate bakah khawtlang hruaitute chu theihtawp chhuaha tan la zel tura fuihin hun hi a khar a ni.