2027/2025-2026

Dated Serchhip, the 24th October, 2025: Little Flower Convent School, Serchhip chuan kum tina an hman thin Parents’ Day chu an school tual zawlah vawiin khan an hmang a. Serchhip DC Pu Paul L Khuma chuan he hun hi a hmanpui.

DC chuan nu leh pa te pawimawhzia sawiin anmahni atangin naupangin thil tinreng an zir chhawng thin a, chuvang chuan nu leh pa te pawh inzir zel turin a fuih a. An thusawite hi naupangin an chhinchhiah thin tih hriaa, an tawngkam hman thlenga fimkhur turin a chah. “Nu leh pa chu thawk dun kan ni a, kan inlungrualnate kan faten an hmuhin an la rawn inzir ve zel dawn a ni. Kan sawi aiin kan nunin kan fate a kaihruai nasa zawk thin” Pu Paul L Khuma chuan a ti. Thil kan sawi hmain kan sawi tur ngaihtuah nawn hmasak thin tur a ni a, kan thu sawiin midang a tina thin em tih te ngaihtuah thin tur a ni, a ti bawk.

Little Flower Convent School hian a vawikhatna atan Band thar an din a. Vawiin hian Our Lady of Assumption Church kawtah Band Set Display an nei nghal a ni.

Vawiin programme ah hian Col. Archit Goswami, 14 Assam Rifles Commandant chu khualzahawm a ni.