No.2506/2020-2020 

Dated Serchhip, the 27th June, 2020 : Vawiin Ni 27/6/20 khan Dr Lalzirmawia Chhangte, IAS, Deputy Commissioner Serchhip District chuan NH-54 Serchhip District chhunga pal tlang laihzau hna thawk mektu KRAM INFRACON Pvt Ltd te hna thawh chu a hmunah kalin a enfiah.

Dr Lalzirmawia Chhangte hian kawng laih hna thawktu KRAM INFRACON Pvt Ltd in  Chhingchhip khaw daia Testing Laboratory an bun te, Company inkulhna hmun Base Camp leh Hot Mix Plant an bun mek te leh Tuikum kama Crusher Plant an bun mek te a hmunah kal in a tlawh a.
KRAM INFRACOM Pvt Ltd te hian Baktawng atanga Keitum inkar kawng laihzau leh siamthat hna kilometer 50.938 a thui an thawk dawn a ni. Tun dinhmunah formation cutting hi kilometre 7 an zo tawh a.

Serchhip DC hi Company hotute Pu Nilesh Tiwari, Manager, Ajit Chhetia, Resident Engineer, PGS Nair, Project Co-Ordinator, KRAM , Sudhir Srivastava, GM KRAM, Sachin Masih DGM KRAM ten lo dawngsawngin, formation cutting thawh mek ah hian June Thla chhunga an target chu 5 kms a nih laiin khaw chhia leh hrileng avangin tun thlengin 1 km chauh an la zawh theih thu an lo hrilh a, nikhatah darkar 10 tal hnathawh theih an in beisei laiin a bik takin khaw chhia leh ruahtui tla tam avangin hnathawhna hun an neih tlem thu an lo hrilh a ni.

Dr Lalzirmawia hian Company hotute chu an harsatna tawhte a hriatthiam pui thu sawiin, theih tawp chhuaha chak zawk a hmala zel turin a chah a. National Highway laihzau hna thawh mekte mipuiten an zawh reng a ngaih tho avangin khualzin veivakte hmakhua ngai a, veivah nuam a kawngpui te buatsaih hram hram turin a hrilh a ni. Tin, Serchhip DC hian khawtual mi a tam thei ang ber chhawr turin a ngen a, an hnathawhna bul vela chengte nen inpawh tawn taka hna thawk ho turin a chah a ni. Tun dinhmun ah hian thawktu mi 260 awmin tualchhung mi 100 vel company hian an chhawr thu Company hotute hian DC hi an lo hrilh a ni. 

Serchhip DC hi Pu Vanlalhmachhuana, Election Officer in a tawiawm a ni.

Attachment

  • Loading attachment...