4069/2024-2025
Dated Serchhip, the 4th February, 2025: Vawiin khan Serchhip DC Pu Paul L Khuma chuan Serchhip DC Pisapui Hall-a programme buatsaihah Road Safety Month a hawng.
DC chuan mihring nunna hlutzia sawiin mahni nunna kan hlut ang bawkin mi dangte nunna kan ngaihlu tur a ni, a ti a. Lirthei khalh fimkhur loh avangin mahni leh mi dang tan chhiatna rapthlak a thleng thei a ni tih hriaa Road Safety Month denchhenin lirthei fimkhur taka khalh a tulzia hre thar leh turin a chah a ni. Lirthei khalh chak lutuk te, rui chunga lirthei khalh te, helmet leh seat belt vuah loa lirthei khalh te, mobile phone hmet paha lirthei khal te leh traffic dan bawhchhiatna te hi lirthei chetsualna thlentu langsar zual panga an ni, Pu Paul L Khuma chuan a ti a. Kum tin Mizorama cheng zawng zawng zat vel nunna suat thin tu lirthei chetsual kan pumpelh theih nan fimkhur taka lirthei khalh thin tur leh, mi dangte zirtirtu Ambassador ni theuh turin kalkhawmte a chah a ni.
Road Safety Month hi kum dangah chuan Road Safety Week anga hman thin a ni a. Mizoram State Road Safety Council chuan February thla pumpui hi Road Safety Month atan hman ni se tia a lo rel angin Serchhipah pawh February ni 1 atang khan Road Safety Month hi hman tan a ni. Road Safety Month neih a nih chhung hian Transport Department leh Traffic te chuan No Tolerance Month an hmang ve nghal a, lirthei khalhtu ten dan an zawm leh zawm loh khauh takin an vil dawn a ni.
Serchhip District Police te chhinchhiah chinah kum 2020 atanga January, 2025 chhungin two wheeler accident vawi 8, 3 wheeler vawi 1, LMV vawi 11, truck accident vawi 9 a thleng tawh a. Heng accident avanga nunna chan hi mi 30 awm tawhin hliam tuar mi 33 an awm tawh bawk a ni.
DTO Pu Vanlaldika kaihhruai Road Safety Month hawnna programme ah hian Additional SP Pu Saidingliana Sailo leh MVI Pu H.Lalrohlua ten traffic rules zawm pawimawhna leh vehicle insurance chungchang sawifiahna hun an hmang a. Kalkhawm ten Road Safety Pledge an sawi rual a. Serchhip District chhunga office tin te pawh thutiam chham tur hian beisei an ni.
