1278/2023-2024

July 27, 2023 : Serchhip DC Pi Nazuk Kumar chuan tukin zing dar 8 khan Serchhip Kawnpui VC Hall thar a hawng.

Pi Nazuk Kumar chuan Serchhip Kawnpui khawtlang hruaituten hun hlu tak an buatsaih thei chu lawmawm a ti a, VC Hall thar hawn tak chu tangkai taka hmang turin duhsakna a hlan. Sawrkar sum piah lamah khawtlang mipuiin thil phal taka an sum leh pai, an tha leh zung te senga Hall tha tak mai an din thei chu chhuanawm a ti a, DC chuan thinlung taka a lawmpui thu a sawi a ni.

Serchhip DC anga programme a hman hnuhnun ber a nih tawh tur thu sawiin Pi Nazuk Kumar chuan Serchhip a awm chhunga duhsakna a dawn zawng zawngah lawmthu a sawi a. A awm chhungin mipuiten chhungkua ang maia an en thu leh, duhsakna leh chawimawina tam tak a dawn thu a sawi a. DC anga a awmna hmasa berah Serchhip DC a ni thei chu vannei a intih thu sawiin hun lo kal zel turah pawh Serchhip District tana tih theih a neih phawt chuan theihtawp chhuah zel a tum thu he hunah hian Pi Nazuk Kumar chuan a sawi a ni.

Serchhip Kawnpui VC Hall hawn tak hi cheng nuai 61.46 senga sak a ni a. A senso hi sawrkar atanga hmuh a nih bakah khawtlang mipui sum leh pai thawhkhawm thahnem tak a tel a ni. A sakna hna hi Serchhip Kawnpui VC ten an thawk a. A sak hun chhung hian kum 4 vel a awh a ni.

Conference Hall hi a chhawng chung berah dah niin mi 150 leng a siam a ni a. Anganwadi Centre, YMA Libary cum meeting hall te, election booth tur te dah a ni bawk.

Hawnna hun tawi zing kara Serchhip DC hova hman a nih hnu hian, chawhnu lamah khawtlang mipui huapin hun hman a ni a. Serchhip DC Pi Nazuk Kumar hian vawiin hian Serchhip chhuahsanin Aizawl DC hna a zawm nghal dawn a ni.