2861/2024-2025

Dated Serchhip, the 6^th November, 2024:  Vawiin nileng khan Serchhip DC Office a officer leh staff ten soft skills and communication training an nei.

Serchhip DC Pu Paul L.Khuma chuan DC Office a Officer leh Staff te thawhpui nuam a tih thu sawiin, an tihtur leh mawhphurhna tha taka hlen thin mi an ni, a ti a.  Chutihrual erawh chuan tute pawh mai hi intuaithar a, inzirthar ngai kan ni a; thlen chin atanga hmasawn tura intuaithar nachang kan hriat loh chuan kan hnathawh thin te ngaiah neiin, hmasawn chuang loa kalphung pangngaia kal pet pet reng theih a ni, a ti a. Chuvangin, Soft Skill leh Communiation training an neih chu intuaitharna hun remchang a ni tih hria a, an thil zir te uluk taka vawnga, a taka nunpui ngei turin a fuih a ni. 

“Office ah thawhpuite nen chhungkua ang maia awm khawmin kan hun tam zawk kan hmang a,  chuvangin thawhhona boruak tha kan neih a, thil tha zawk kan zir thar zel hi a tul a ni”, DC chuan a ti a. Kan hmanruate tuaihriam nachang kan hriat loh chuan hmantlak loh kan ni thuai mai dawn a ni, tiin, thiamna nei tura hmalakna hi sum khawhralna ni loin, office a thawktute tan mai bakah an rawngbawlsak sawrkar leh mipui tan hlawkna tha zawk an hmuh let ngei a beisei thu a sawi a ni. 

Soft Skills and Communication Certified Trainer Pi Jacinta Colney chu resource person niin Serchhip DC Office a thawktu zawng zawng te he hunah hian an tel a.  Office a thawhhona boruak tha siam dan te, pawn lam atanga dawrtu mipui mimirte dawnsawn dan te, hruaitu tha ni tura thil pawimawh te, hun vawn dik time management te, harsatna a thlen thulha inremna kawng zawn dan conflict resolution te, sawrkar leh mipui rawng an bawlna kawnga thil thar tha zawk ngaihtuah chhuah dan te, hawihawmna leh awm dan mawi te, mihring nunphung thil pawimawh chi hrang hrang te funkim takin vawiin hian an zirho a ni.