548/2024-2025

Dated Serchhip, the 23rd May, 2024: Serchhip District chhung Kanghmun South khua chuan an Branch YMA din champhaphak vawi 50-na chu vawiin khan Kanghmun South Community Hall-ah ropui takin an lawm a. He hunah hian Serchhip Bawrhsap Pu David Lalthantluanga chu khuallian a ni.

DC Pu David Lalthantluanga chuan Kanghmun South YMA leh a khaw mipui zawng zawngte Golden Jubilee chibai bukin vawiin thlenga Kanghmun South Branch YMA nung taka a kal zel a lawmpui thu a sawi a. “Kan kum 50-na mel lung pawimawh tak kan phun belhna niah hian kan khaw tan, kan District tan, Zoram tan rah tha chhuah tir ngei i tum ang u”, tiin kalkhawm te a chah a ni. DC chuan Kanghmun South khua chu khaw inlungrual leh thangduang, hmasawnna kawnga ke pen mek an ni tiin infiamna te, zirna te, eizawnna leh kawng hrang hranga hma an sawnnaah a lawmpui a. Europe ram fanga zin mek India Junior Women’s Hockey Team a tel pha nula chhuanawm F.Lalthantluangi an khua in an neih thu sawiin Mizo thalai infiamna lama tuimi te tana entawn tlak leh chona ropui tak a nih thu a sawi a ni.

Khuallian Pu David Lalthantluanga chuan ruihhlo dona kawngah tan lak nasat a tul zia a sawi a. Mizo thalai zingah ruihhlo vanga kum naupang taka thi an tam tawh zia sawiin Mizoram run mek tu ruihhlo do tur hian sawrkar leh YMA mai bakah, chhungkua leh mimal tinte kan pawimawh a ni, a ti a. Zirna chungchang pawh sawiin theihtawpa tan la turin DC chuan kalkhawmte a fuih a. Zirna chu kawng engkima hmasawnna “all round development” min thlen tu a ni a, khawvel tukverha kan dahchhuah theihna kawng pawimawh ber a ni, a ti a. “Serchhip District hi India ram pumah ziak leh chhiar thiam tamna ber District kan ni a, Literate district ringawt ni lo educated district kan nih a pawimawh a ni”, a ti.

Golden Jubilee lawmna hi hun hnihah then niin chhun leh zanah hun hman a ni a. Chhun programme hi an Branch YMA President Pu R.Lalhmunsiama chuan a kaihruai a. Pu R.Lalnungrenga, DFO Thenzawl chu khual zahawm a ni. Serchhip Sub Headquarters YMA aiawhin President Pu R. Kawlthuama Jubilee Souvinir a tlangzarh a, Vantawng Group YMA President Pu C. Lalnunthara te pawhin thu an sawi a ni.