2828/2023-2024

Dated Serchhip, the 22nd November, 2023: Serchhip DC Pu David Lalthantluanga, Competent Authority for Land Acquisition (CALA) chuan vawiin khan Mualpui Chhingchhip VC area, Venghlun Chhingchhip VC area, Chhiahtlang North & South VC area te a tlawh a. National Highway 54 kawng chei that mekah NHDICL te hmalak dan a enfiah a, compensation dawng tawh zingah in leh lo la thiat lo an awm em tih leh an thiah loh chhan te a hmunah tlawhin a endik a ni.

NH54 kawngpui laih mekah hian Serchhip District huam chhungah sawrkarin ram a lak fel tawh, compensation dawng tawh zinga za zela 93 chuan an in te an thiat fel tawh a. Amaherawhchu, chhan hrang hrang avangin compensation la tawh zingah mahni in la thiat ve lo te an awm tih hriat a ni. Kum 2018 leh 2019 khan DC chuan 3D Notification tichhuakin compensation dawng tur te hi chiang takin a lo tarlang tawh thin a. Heng mi te hian compensation an dawn fel tawh avangin an ram te hi sawrkarin dan angin neitu nihna a nei fel tawh a, tluang taka hna thawh chhunzawm a nih theih nan hun tiam chhungin mahni in thiatfel vek tawh tura beisei an ni. Zangnadawmna la tawh zingah in thiat lo an la awm avangin kum 2023 July leh August thla khan Magistrate ten an inah ngei kal chilhin an in te thiat tura thupek eviction notice pawh pek an lo ni tawh bawk a ni.

Eviction Notice dawng tute hian thupek zawm lo a, an in te an lo thiat lo a nih chuan sawrkar chuan dan anga hmalain IPC Sec 188 tlawhchhana thubuai siam sak an ni dawn a. Hetiang thil hi a thlen loh na turin compensation dawng tawh, eviction notice dawng tawh zingah mahni in leh lo thiat lo an la awm chuan DC chuan thiat vek turin mipui te a chah nawn leh a. Vawiinah hian Chhingchhip leh Chhiahtlanng khaw chhungah hmun engemawzat a tlawh a. Khaw dang te pawh DC hian hun remchang hmasa berah a tlawh chhunzawm dawn a. Sawrkarin dan leh thupek lek kawh a, thubuai siamsak kher an ngaih lohna turin a rang lama an in te lo thiat fel turin Serchhip DC, CALA ni bawk chuan mipuite a ngen a ni.

Chhingchhip leh Chhiahtlang a National Highway Monitoring Committee member te chuan DC hi tawiawmin kawngpui laih meka harsatna awm te, khawtlang mipui lam mamawh te District hotute hnenah an thlen a. DC chuan an thuthlente tha taka lo dawngsawngin danin a phal chin ang zela hmalak pui a tum thu a sawi. Khawtlang leh ramin hma a sawnna tur leh kawngpui tha kan neih theihna tura sawrkar hmalakna te tawiawm turin Pu David Lalthantluanga chuan mipuite a sawm a. Kum thar March thla tawpah kawngpui hi hawn hman ngei tum a nih avangin hmanhmawh taka hmalak a tul a, theihtawpin i tang tlang ang u, tiin mipuite a ngen a ni.

Serchhip DC Pu David Lalthantluanga hi Addl. DC Pu Lalnundika, PMU-Seling General Manager leh Village Council member ten an tawiawm a ni.